Shqipëria prodhon më shumë mbetje, çdo banor gjeneroi mesatarisht 360 kg në 2024
Në vitin 2024, Shqipëria ka prodhuar mbi 862 mijë tonë mbetje, duke shënuar një rritje prej 2.14%, krahasuar me vitin 2023.
Rritja e mbetjeve në tre vitet e fundit
Në vitin 2024, Shqipëria prodhoi mbi 862 mijë tonë mbetje, duke shënuar një rritje prej 2.14% krahasuar me vitin 2023. Çdo qytetar gjeneroi mesatarisht 360 kilogramë mbetje në vit, ose 9 kilogramë më shumë se dy vite më parë.
Të dhënat tregojnë një trend të qartë rritës:
-2022 – 820 mijë tonë, 295 kg për banor
-2023 – 844 mijë tonë, 351 kg për banor
-2024 – 862 mijë tonë, 360 kg për banor
Vetëm për mbetjet urbane, rritja është edhe më e dukshme, nga 261 kg për banor në 2022, në 322 kg për banor në 2024.
Struktura e mbetjeve
Pjesa më e madhe e mbetjeve, 89.5%, janë familjare ose të ngjashme me to, duke përfaqësuar rreth 771 mijë tonë. Struktura e tyre mbetet pothuajse e pandryshuar ndër vite:
57.3% janë mbetje organike
-9-10% përbëhen nga plastika
-9-10% përbëhen nga letra dhe kartoni
Menaxhimi i mbetjeve
Panorama e menaxhimit të mbetjeve mbetet e njëjtë si në vitet e mëparshme, me dominim të depozitimit në landfille:
-76.3% e mbetjeve u depozituan në vendgrumbullime
-18.8% u ricikluan
-4.9% u përdorën për prodhimin e energjisë
Një zhvillim pozitiv është reduktimi i hedhjeve të paligjshme, të cilat ranë në vetëm 0.02% të totalit.
Një sfidë për të ardhmen
Rritja e pandërprerë e mbetjeve përbën një sfidë serioze për mjedisin dhe menaxhimin urban. Ndërsa prodhimi i mbetjeve rritet çdo vit, kapacitetet për riciklim dhe menaxhim mbeten pothuajse të pandryshuara. Kjo situatë nënvizon nevojën për investime të reja dhe teknologji më efikase në fushën e menaxhimit të mbetjeve./Scantv
