BSH: Çmimet e banesave në 6 mujorin e parë u rritën 41.7 për qind në raport me një vit më parë
Sipas të dhënave të Bankës, çmimet e pronave në periudhën janar-qershor u rritën me ritme më të shpejta në bregdet sesa në Tiranë.
Rritja e çmimeve të pronave
Sipas Bankës së Shqipërisë, çmimet e banesave në 6-mujorin e parë të vitit u rritën me 41.7% në raport me një vit më parë. Rritja ishte më e shpejtë në zonat bregdetare sesa në Tiranë, ku indeksi i çmimeve u rrit 5.1% në terma gjashtëmujorë dhe 32.6% në raport me një vit më parë.
"Çmimi mesatar i banesave u rrit me 14.6% në terma gjashtëmujorë dhe me 41.7% ndaj një viti më parë. Për Tiranën, indeksi u rrit 5.1% në terma gjashtëmujorë dhe 32.6% ndaj nivelit të një viti më parë", vlerëson Banka e Shqipërisë.
Tregu i pronave dhe koha e shitjes
Për shkak të çmimeve të larta, koha e shitjes së një prone është rritur krahasuar me vitet e kaluara. Kjo situatë është ndikuar nga zhvillimet në tregun e Tiranës dhe nga rritja më e shpejtë e çmimeve në bregdet.
Oferta dhe kërkesa
Kërkesa për objekte banimi ka mbetur e qëndrueshme, ndërsa rritja e ofertës, sipas numrit të lejeve dhe sipërfaqes së ndërtimeve të reja, ka rënë lehtë. Kostot e ndërtimit janë rritur gjatë gjashtëmujorit të parë, por në ritme më të ulëta se çmimet e pronave.
Kredidhënia dhe perspektivat
Blerja e pronave është mbështetur nga rritja e kredive për këtë gjashtëmujor. Megjithatë, bankat kanë paralajmëruar një ngadalësim të kredidhënies në tremujorin e tretë të vitit, për shkak të kufizimeve në kredidhënie që vendosi Banka e Shqipërisë dhe që hyn në fuqi më 1 korrik 2025. /Shqiparja.com
