74 mijë aplikime për kredi në 6 muaj, bankat refuzuan 30 për qind të tyre
Banka e Shqipërisë raporton se kërkesa për kredi nga sektori privat është rritur gjatë gjashtëmujorit të parë të vitit 2025, megjithëse bankat kanë forcuar kriteret e miratimit.
Aplikimet për kredi në gjysmën e parë të vitit
Sipas të dhënave zyrtare, numri total i aplikimeve për kredi të shqyrtuara nga bankat u rrit me 1.7% krahasuar me të njëjtën periudhë të një viti më parë, duke arritur në 73,646 aplikime. Pjesa dërrmuese e tyre, rreth 92%, i përkiste individëve, një rritje e lehtë nga 91% një vit më parë. Kërkesa u shtua vetëm nga individët me 2.7%, ndërsa ndërmarrjet e vogla dhe të mesme pësuan një rënie të ndjeshme prej 14.3% dhe ndërmarrjet e mëdha një tkurrje më të lehtë prej 0.8%.
Rritja e refuzimeve të kredisë
Megjithëse kërkesa për kredi është rritur, bankat janë treguar dukshëm më selektive. Rreth 30% e aplikimeve u refuzuan, çka përbën një rritje me 5.1 pikë përqindjeje krahasuar me të njëjtën periudhë të vitit të kaluar. Ky shtrëngim ka qenë më i theksuar tek ndërmarrjet e vogla dhe të mesme, të cilat kanë hasur vështirësi më të mëdha në sigurimin e financimeve.
Qëndrimi i bankave vendase dhe të huaja
Të dhënat tregojnë dallime të qarta midis bankave vendase dhe atyre me kapital të huaj. Bankat e huaja kanë qenë dukshëm më të rrepta në miratimin e kredive për individë, duke refuzuar rreth 40% të aplikimeve, ndërsa bankat vendase kanë refuzuar vetëm 18%. Në segmentin e bizneseve, bankat e huaja kanë treguar një qëndrim shtrëngues ndaj ndërmarrjeve të vogla dhe të mesme, me një normë refuzimi prej 20%, por kanë ruajtur një qasje më mbështetëse ndaj ndërmarrjeve të mëdha, ku vetëm 2% e kërkesave janë refuzuar. Nga ana tjetër, bankat vendase kanë ndjekur një qasje më të balancuar, duke refuzuar rreth 5% të kërkesave të SME-ve dhe po aq nga ndërmarrjet e mëdha.
Kreditimi i ekonomisë në rritje
Pavarësisht shtrëngimit të kritereve, kreditimi i ekonomisë ka vijuar të rritet. Për periudhën janar–korrik 2025 janë dhënë gjithsej 231.9 miliardë lekë kredi të reja, me një rritje prej 10% krahasuar me një vit më parë. Ndërsa një vit më parë rritja ishte mbështetur kryesisht te kreditimi i bizneseve, këtë vit kontributin kryesor e ka dhënë rritja e huave për individë. Vetëm ky segment arriti në 77 miliardë lekë kredi të reja, me një rritje prej 26% në krahasim me të njëjtën periudhë të vitit të kaluar, kryesisht për blerjen e pasurive të paluajtshme dhe financimin e konsumit. Ndërkohë, kreditimi i bizneseve mbeti pothuajse në vend, me një rritje modeste prej vetëm 1.1%, duke arritur në 151.3 miliardë lekë.
Perspektiva e tregut bankar
Shifrat konfirmojnë se individët janë kthyer në motorin kryesor të rritjes së kredisë, ndërsa kreditimi i bizneseve ka humbur ritmin e mëparshëm. Ekspertët vlerësojnë se kjo prirje lidhet me rritjen e kërkesës për banesa dhe konsum, por edhe me kujdesin në rritje të bankave për ekspozimin ndaj riskut në sektorin privat.
/Monitor (https://monitor.al/bankat-moren-pothuajse-74-mije-aplikime-per-kredi-ne-6-muaj-refuzuan-30-te-tyre/)
Më të lexuarat
