BERZH parashikon rritje ekonomike 3.5 për qind Shqipërinë dhe 3.9 për qind për Kosovën
Kosova dhe Shqipëria pritet të kryesojnë rritjen ekonomike në Ballkanin Perëndimor gjatë viteve 2025 dhe 2026, sipas projeksioneve të BERZH.
Projeksionet e BERZH për rajonin
Banka Evropiane për Rindërtim dhe Zhvillim (BERZH) parashikon që rritja reale në Ballkanin Perëndimor të jetë mesatarisht 2.7% në vitin 2025 dhe 3.2% në vitin 2026. Kosova me 3,9% dhe Shqipëria me 3,5% do të shënojnë ritmet më të larta të rritjes ekonomike në rajon gjatë këtyre viteve.
Raporti thekson se pasiguria e vazhdueshme globale dhe kërkesa e dobët nga Bashkimi Evropian do të vijojnë të ushtrojnë ndikim mbi eksportet, tregtinë, investimet dhe remitancat, sidomos në vendet me orientim të fortë eksportues si Serbia, Bosnja dhe Hercegovina dhe Maqedonia e Veriut. Ekonomitë e varura nga turizmi, si Kosova, Shqipëria dhe Mali i Zi, gjithashtu preken nga pasiguritë në ekonomitë e BE-së.
Faktorët që mbështesin rritjen
Sipas BERZH, konsumi privat elastik, rritja e pagave dhe investimet publike kanë luajtur një rol të rëndësishëm në mbështetjen e aktivitetit ekonomik. Megjithatë, reformat strukturore dhe progresi drejt integrimit në Bashkimin Evropian mund të jenë elementët kryesorë që do të nxisin rritjen e mëtejshme.
Raporti paralajmëron se rritja e kostove të punës për njësi dhe inflacioni mbeten sfida serioze, ndërsa paqëndrueshmëria politike në disa vende të rajonit vijon të rëndojë mbi investimet.
Perspektiva e Shqipërisë
Për Shqipërinë, BERZH thekson se rritja ekonomike u moderua në 3.4% në tremujorin e parë të vitit 2025. Ky rezultat u mbështet kryesisht nga sektori i shërbimeve dhe ndërtimit, ndërsa industria dhe bujqësia përjetuan tkurrje të lehta.
Nga ana e shpenzimeve, aktiviteti ekonomik ishte i balancuar, me rritje të dukshme të konsumit qeveritar dhe eksporteve të mallrave dhe shërbimeve. Deficiti i llogarisë rrjedhëse u ngushtua me mbi 40% krahasuar me një vit më parë, duke reflektuar përmirësime në të gjithë komponentët kryesorë. Inflacioni mbeti i ulët, me një normë vjetore prej 2.3% në gusht.
Rreziqet dhe mundësitë
BERZH paralajmëron për disa rreziqe që lidhen me uljen e kërkesës në Eurozonë, rënien e remitancave dhe faktorët klimatikë të pafavorshëm, si thatësira. Nga ana tjetër, zbatimi i përshpejtuar i reformave strukturore dhe përparimet në procesin e integrimit në BE, të mbështetura nga Plani i Rritjes i BE-së për Ballkanin Perëndimor, mund të përmirësojnë dukshëm perspektivën e rritjes së Shqipërisë. /Scan
