Përfundon mbledhja e qeverisë, Veliaj shkarkohet nga detyra si kryebashkiak i Tiranës
Këshilli i Ministrave ka thënë fjalën e fundit duke shkarkuar Veliajn nga posti i kryetarit të bashkisë së Tiranës.
Këshilli i Ministrave ka shkarkuar Erion Veliajn si kryebashkiak i Tiranës. Vendimi u mor sot në mbledhjen e Keshillit të Ministrave, të drejtuar nga kryeministri Edi Rama.
Mbledhja erdhi një ditë pasi Prefekti i Tiranës i njoftoi zyrtarisht për propozimin e miratuar nga Këshilli Bashkiak. Sipas ligjit, është qeveria që merr vendimin përfundimtar në këtë proces.
Pasditen e së martës, Këshilli Bashkiak bashkoi në një të vetme kërkesën e këshilltarëve socialistë për shkarkimin e Veliajt me atë të PD-së dhe Endri Shabanit, duke e miratuar me 50 vota pro. Veliaj e ka kundërshtuar procedurën e ndjekur, duke lënë të kuptohet se mund të ankimojë në Gjykatën Kushtetuese. Neni 115 i Kushtetutës parashikon se, nëse bëhet ankim brenda 15 ditësh, vendimi i Këshillit të Ministrave pezullohet. Ky akt do të bllokonte zhvillimin e zgjedhjeve në Tiranë.
Megjithatë, kryeministri Edi Rama po ecën me logjikën e faktit të kryer. Një ditë më parë, në një takim me ministrat dhe deputetët e qarkut të Tiranës, përkrah kandidates për kryebashkiake Ogerta Manastirliu, Rama e konsideroi vendimin për shkarkimin e Veliajt si të detyrueshëm. Kryeministri u shpreh se Tirana nuk mund të gdhihet dhe ngryset si “trup pa kokë” dhe qytetarët nuk mund të bashkëjetojnë me një “bashki kokëkëputur”, duke shtuar se opozita do të hyjë e humbur në garën për kryeqytetin.
Më herët dje, Rama zhvilloi një takim mbi dy orë në Kryeministri me nënkryetarët e Bashkisë së Tiranës, kryetaren e komanduar Anuela Ristani, si dhe me Manastirliun.
Veliaj është në arrest në burg që prej 10 shkurtit. SPAK e ka mbyllur dosjen në ngarkim të tij dhe e ka dërguar në gjyq, me 13 akuza, prej të cilave korrupsion në 9 raste. Veliaj ka drejtuar bashkinë e Tiranës prej 10 vitesh, ose dy mandate e gjysmë, prej vitit 2015.
