Kosova e para në botë dhe Shqipëria e nënta për rënien e popullsisë në vitin 2024
Alarm i kuq për popullsinë në Kosovë dhe Shqipëri. Të dy kombet shqiptare po përballen me valë largimesh që po pakësojnë vit pas viti popullsitë vendase.
Rritja e popullsisë prej kohësh është parë si një shenjë mirëqenieje, por bota po përballet me një trend të ri: rënien demografike. Sipas të dhënave të Bankës Botërore, të përpunuara nga Visual Capitalist, 42 vende dhe territore janë tashmë në tkurrje, disa prej tyre me ritme më të shpejta se të tjerët.
Të dhënat bazohen duke matur normat vjetore të rritjes së popullsisë për vitin 2024. Duhet theksuar se popullsia e botës në tërësi vijon të rritet me një mesatare prej 1%.
Evropa Lindore udhëheq në rënien e popullsisë
Një pjesë e konsiderueshme e vendeve që po tkurren ndodhen në Europën Lindore, ku Kosova, Moldavia dhe Maqedonia e Veriut shënojnë rëniet më të theksuara. Një arsye madhore e këtij trendi është emigracioni, largimi nga vendi i origjinës për t’u vendosur në një tjetër. Evropa Lindore ka përjetuar nivele të larta emigracioni gjatë dekadave të fundit për shkak të hendekut të pagave me Evropën Perëndimore, si dhe integrimit në BE, i cili ka krijuar rrugë të ligjshme për lëvizjen e fuqisë punëtore.
Ekonomitë e mëdha i bashkohen listës
Një trend tjetër interesant është përfshirja e ekonomive të mëdha si Gjermania, Japonia, Kina dhe Italia. Ndërsa rëniet e tyre janë më të moderuara, përmasa e madhe e këtyre vendeve nënkupton se ky ndryshim demografik mund të ketë pasoja të gjera globale.
Qeveritë po marrin masa për të nxitur normat e lindshmërisë, por është ende herët për të vlerësuar efektshmërinë e tyre.
Në Japoni, për shembull, qeveria ka krijuar Agjencinë për Fëmijët dhe Familjet, një organ i ri administrativ që mbikëqyr çështje si mirëqenia e fëmijëve dhe aksesi në çerdhe. Ndërkohë, në Kinë është prezantuar një subvencion kombëtar prej 3,600 juanësh (rreth 500 dollarë amerikanë) në vit për çdo fëmijë nën moshën tre vjeç. /ekofin.al(https://ekofin.al/kosova-e-para-ne-bote-dhe-shqiperia-e-nenta-per-renien-e-popullsise-ne-vitin-2024/)
