Balluku: 1500 MW nga burime të rinovueshme deri në 2030, nis edhe linja nënujore me Italinë
Shqipëria synon të pozicionohet si një lider rajonal në prodhimin dhe eksportin e energjisë së rinovueshme deri në vitin 2030, përmes një strategjie ambicioze zhvillimi në sektorin energjetik.
Zëvendëskryeministrja, njëherësh ministre e Infrastrukturës dhe Energjisë, Belinda Balluku bëri të ditur sot se gjatë 4 viteve në vijim, vendi do të shtojë kapacitetet e prodhimit nga burime të rinovueshme çdo vit, duke arritur një total prej 1500 MW deri në vitin 2030.
Një nga projektet kryesore, theksoi Balluku, është ndërtimi i parkut më të madh eolik në Tropojë, me kapacitet prej 600 MW.
Një tjetër hap i rëndësishëm, vuri në dukje ajo, është gazifikimi i qytetit të Korçës dhe investime të tjera për përmirësimin e rrjetit të transmetimit të gazit natyror.
Për të forcuar lidhjet rajonale, Balluku tha se do të investohet për ndërtimin e lidhjeve të reja të interkoneksionit me Greqinë, Maqedoninë e Veriut, dhe Kosovën.
Po ashtu, vijoi Balluku, planifikohet të nisë ndërtimi i linjës së re nënujore Shqipëri-Itali për integrim të plotë në tregun europian të energjisë.
Në drejtim të sigurisë energjetike, qeveria ka parashikuar zhvillimin e projekteve të depozitimit energjetik, siç janë ato në Koman dhe Fierzë, si dhe në kaskadën e Devollit.
Këto projekte do të krijojnë një rezervë strategjike energjie, duke garantuar furnizim pa ndërprerje edhe gjatë periudhave të pasigurta për burimet rinovueshme.
Investimet në vitet e fundit kanë bërë të mundur dyfishimin e kapaciteteve energjetike, nga 1768 MW në 3298 MW, si dhe uljen e humbjeve në shpërndarje nga 50% në 17%.
“Në 4 vitet në vijim planifikojmë uljen e humbjeve në rrjet në 12%”, tha Balluku./ekofin.al
