Kredia e siguruar me pasuri të paluajtshme arrin në 4 miliardë euro
Kredia e siguruar me pasuri të paluajtshme në Shqipëri ka arritur në rreth 4 miliardë euro, duke treguar një rritje të fortë në tregun financiar dhe atë të pasurive të paluajtshme.
Rritja e kredisë me kolateral
Sipas të dhënave të Bankës së Shqipërisë, në fund të gjashtëmujorit të parë të vitit 2025, rreth 76% e portofolit të kredisë bankare ishte i mbuluar me kolateral, nga 75% një vit më parë. Kolaterali dominues mbeten pasuritë e paluajtshme, të cilat zënë 46% të tepricës së kredisë ose 61% të kredisë së kolateralizuar.
Stoku i kredisë së mbuluar me pasuri të paluajtshme është rritur me 9% krahasuar me vitin e kaluar, kryesisht falë zgjerimit të kredisë për banesa. Krahas pasurive të paluajtshme, kolateralet e tjera përfshijnë instrumente financiare si cash, aksione, apo portofol kredie performues, si dhe pasuri të luajtshme.
Kredia bankare dhe ekspozimi ndaj pasurive të paluajtshme
Në mesin e vitit 2025, kredia e dhënë nga sektori bankar arriti në 855 miliardë lekë. Nga kjo shumë, rreth 393 miliardë lekë ose afërsisht 4 miliardë euro janë të siguruara me pasuri të paluajtshme.
Ekspozimi i përgjithshëm i bankave në këtë segment është 429 miliardë lekë, ku 54% e kredisë i takon individëve dhe 46% bizneseve. Kredia për pasuri të paluajtshme është rritur me 16% në bazë vjetore dhe përbën më shumë se gjysmën e portofolit të kredisë së dhënë për sektorin privat.
Rreziqet dhe masat e reja të Bankës së Shqipërisë
Në shumicën e rasteve, kreditë për pasuri të paluajtshme sigurohen me vetë pronën e blerë. Një krizë e mundshme në tregun e pasurive të paluajtshme do të ulte vlerën e kolateralit dhe do të rrite rrezikun e humbjeve për bankat.
Për këtë arsye, nga korriku 2025, Banka e Shqipërisë ka vendosur standarde më të rrepta për kredidhënien. Raporti tavan i kredisë ndaj vlerës është përcaktuar 85% për shtëpinë e parë dhe 80% për të dytën në lekë, ndërsa në valutë përkatësisht 75% dhe 70%. Raporti i shërbimit të borxhit ndaj të ardhurave është 40% për shtëpinë e parë dhe 35% për të dytën në lekë, ndërsa në valutë 35% dhe 30%.
Këto masa synojnë të ruajnë stabilitetin financiar, duke balancuar rritjen e shpejtë të çmimeve të banesave me aftësinë paguese të kredimarrësve dhe cilësinë e portofolit bankar. /Monitor(https://monitor.al/kredia-e-siguruar-me-pasuri-te-paluajtshme-arrin-ne-kater-miliarde-euro/)
