Mbyllen aplikimet për Skemën Kombëtare të Investimeve, dyfishohen krahasuar me 2024
Skema Kombëtare e Investimeve 2025 ka tërhequr interes të lartë nga fermerët shqiptarë, me 801 aplikime të regjistruara deri më 30 shtator, duke shënuar dyfishim krahasuar me një vit më parë.
Interes rekord për Skemën Kombëtare të Investimeve 2025
Më 30 shtator u mbyllën aplikimet për Skemën Kombëtare të Investimeve në Bujqësi 2025, me gjithsej 801 aplikime të regjistruara për nëntë masa mbështetëse që synojnë modernizimin e fermave, rritjen e prodhimit vendas dhe zhvillimin e qëndrueshëm të zonave rurale.
Ministri i Bujqësisë dhe Zhvillimit Rural, Andis Salla, deklaroi se procesi ndodhet aktualisht në fazën e shqyrtimit administrativ, në përputhje me kriteret dhe afatet e përcaktuara në udhëzimet e skemës, me qëllim garantimin e transparencës, korrektësisë dhe mbështetjes reale për çdo fermer.
“Angazhimi ynë është të garantojmë transparencë, korrektësi dhe mbështetje reale për çdo fermer që ka zgjedhur të investojë në të ardhmen e bujqësisë shqiptare. Interesi i lartë për këtë skemë është dëshmi e besimit në politikat tona mbështetëse për sektorin rural”, u shpreh Salla.
Dyfishim i aplikimeve krahasuar me vitin 2024
Krahasuar me vitin e kaluar, aplikimet janë dyfishuar. Në vitin 2024, për Skemën Kombëtare të Investimeve në Bujqësi u regjistruan 404 aplikime, nga të cilat 360 përmbushën kriteret e përzgjedhjes dhe 280 u kualifikuan për mbështetje financiare.
Sipas AZHBR, numri më i lartë i aplikimeve të kualifikuara i përkiste investimeve në mekanizimin e fermave, ndërtimin e stallave blegtorale dhe stabilimenteve për shpendë, si dhe ndërtimin e serrave diellore — fusha që vijojnë të jenë prioritet edhe në vitin 2025.
Mbështetje financiare deri në 50% të investimit
Skema Kombëtare e Investimeve 2025 ofron një mbështetje të gjerë financiare me fond total prej 20 milionë eurosh.
Përfituesit mund të përfitojnë:
-Grante deri në 50% të vlerës së investimit,
-Kredi të buta me normë interesi 2%,
-Si dhe garanci sovrane për lehtësimin e aksesit në financim.
Këto instrumente financiare synojnë të nxisin modernizimin e bujqësisë shqiptare, të rrisin efikasitetin prodhues dhe të përmirësojnë konkurrueshmërinë në tregjet vendase dhe ndërkombëtare.
Fushat e investimit dhe procesi i përzgjedhjes
Skema përfshin një gamë të gjerë fushash investimi, ndër to:
ndërtimi i serrave diellore, mbjellje të reja me pemë frutore, ullinj dhe vreshta, sisteme moderne ujitjeje, rrjeta mbrojtëse antibreshër, infrastrukturë për blegtori dhe shpendari, përpunim dhe paketim të produkteve bujqësore, zhvillim të agroturizmit, si dhe mbështetje për sektorin e akuakulturës.
Pas përfundimit të shqyrtimit administrativ, aplikimet që plotësojnë kriteret do të kalojnë në fazën e vlerësimit teknik dhe më pas në përzgjedhjen përfundimtare të përfituesve, në bazë të një renditjeje të drejtë dhe transparente.
Angazhim për zhvillimin e qëndrueshëm të sektorit rural
Ministria e Bujqësisë dhe Zhvillimit Rural mbetet e angazhuar për të përkrahur fermerët shqiptarë në rritjen e kapaciteteve prodhuese dhe përmirësimin e konkurrueshmërisë së bujqësisë shqiptare, duke e pozicionuar sektorin si një shtyllë të rëndësishme të zhvillimit ekonomik dhe rural të vendit. /Monitor(https://monitor.al/mbyllen-aplikimet-per-skemen-kombetare-te-investimeve-dyfishohen-krahasuar-me-2024/)
Më të lexuarat
