Moody’s mban të pandryshuar vlerësimin për Shqipërinë, ekonomi e qëndrueshme

Moody’s thekson se stabiliteti makroekonomik u ruajt gjatë tri goditjeve të mëdha që prekën ekonominë shqiptare, siç ishte tërmeti, pandemia dhe kriza energjetike evropiane.

Agjencia ndërkombëtare e vlerësimit të kredisë Moody’s ka konfirmuar perspektivën e qëndrueshme të ekonomisë shqiptare, duke vlerësuar ruajtjen e stabilitetit makroekonomik dhe aftësinë e vendit për t’u rimëkëmbur pas tri goditjeve të mëdha: tërmetit, pandemisë dhe krizës energjetike evropiane.

Stabilitet makroekonomik dhe rritje e qëndrueshme

Sipas njoftimit të Ministrisë së Financave, Moody’s thekson se ekonomia shqiptare ka treguar qëndrueshmëri dhe fleksibilitet të lartë në përballimin e krizave të fundit. Agjencia parashikon që perspektiva afatmesme e rritjes ekonomike të mbetet e qëndrueshme, e mbështetur nga konsumi vendas dhe investimet në turizëm, energji dhe infrastrukturë.

Rritja reale e PBB-së vlerësohet të jetë 3.7% në vitin 2025 dhe 3.5% në vitin 2026, me sektorin e turizmit që pritet të mbetet një nga kontribuuesit kryesorë përmes rritjes së eksporteve të shërbimeve dhe investimeve të lidhura me ndërtimin.

Përmirësim fiskal dhe ulje e borxhit publik

Në aspektin fiskal, Moody’s evidenton trendin pozitiv të uljes së borxhit publik, që ka rifilluar të bjerë që prej vitit 2022.

Raporti i borxhit publik ndaj PBB-së ra në 54.2% në vitin 2024, nga piku prej 74.1% në vitin 2021, dhe pritet të ulet më tej në 53.5% deri në vitin 2026, i mbështetur nga rritja ekonomike dhe një suficit primar fiskal.

Agjencia vlerëson gjithashtu se autoritetet shqiptare pritet të respektojnë rregullat fiskale të përcaktuara në Ligjin Organik të Buxhetit, duke mbajtur një bilanc primar të paktën të balancuar dhe duke ulur gradualisht borxhin publik deri në 45% të PBB-së.

Investimet e huaja dhe llogaria korrente

Moody’s thekson se investimet e huaja direkte (IHD) po luajnë rol të rëndësishëm në zbutjen e rreziqeve të deficitit të llogarisë korrente, i cili qëndroi në 2.4% të PBB-së në vitin 2024 dhe pritet të mbetet në nivele të ngjashme gjatë viteve 2025–2026.

Ky është një përmirësim i dukshëm krahasuar me mesataren prej 7.3% të PBB-së të periudhës 2017–2022.

Sektori financiar dhe reformat strukturore

Sektori financiar shqiptar vlerësohet si i mirëkapitalizuar dhe likuid, me rreziqe të kufizuara sistemike. Moody’s nënvizon se stabiliteti financiar është faktor kyç në ruajtjen e besimit të investitorëve dhe në mbështetjen e kredidhënies për ekonominë reale.

Shqipëria pritet të vazhdojë të përfitojë nga fondet e Bashkimit Evropian, ndërsa reformat në sundimin e ligjit, luftën kundër korrupsionit dhe mirëqeverisjen do të jenë thelbësore për përshpejtimin e procesit të anëtarësimit.

Integrimi ekonomik me BE-në, si partneri më i madh tregtar i Shqipërisë, do të kontribuojë në rritjen e qëndrueshme afatmesme dhe ngushtimin e hendekut të të ardhurave me vendet anëtare të Unionit.

Sygjerim për investitorët dhe sinjal pozitiv ndërkombëtar

Ky rikonfirmim i vlerësimit nga Moody’s përbën një sinjal pozitiv për investitorët ndërkombëtarë, duke dëshmuar stabilitetin fiskal, përparimin në reformat strukturore dhe përkushtimin e qeverisë shqiptare ndaj objektivave strategjikë të integrimit në Bashkimin Evropian.

/Monitor (https://monitor.al/moodys-mban-te-pandryshuar-vleresimin-per-borxhin-ba3-perspektiva-e-qendrueshme/)

Më të lexuarat