Forumi Shqipëri–Turqi 2025, Rama fton investitorët turq të ridyfishojnë investimet në vend
Në Tiranë u hap Forumi i Investimeve Shqipëri–Turqi 2025, me mbi 500 biznesmenë turq, për të nxitur bashkëpunimin ekonomik dhe investimet e huaja.
Rama: Nga 250 milionë euro në mbi 1 miliard tregti dypalëshe
Në një video-mesazh të dërguar për pjesëmarrësit, kryeministri Edi Rama vlerësoi marrëdhëniet e qëndrueshme midis dy vendeve dhe u bëri thirrje investitorëve turq të “ridyfishojnë” investimet në Shqipëri. Ai theksoi se bashkëpunimi ekonomik ka njohur një rritje të jashtëzakonshme gjatë dekadës së fundit, duke kaluar nga 250 milionë euro në mbi 1 miliard euro shkëmbime tregtare vetëm në 9 muajt e parë të këtij viti. Numri i sipërmarrjeve me kapital turk është trefishuar, duke arritur mbi 1 mijë kompani që punësojnë rreth 15 mijë shqiptarë.
Thirrja për investime të reja dhe bashkëpunim strategjik
Rama theksoi se Shqipëria është “një ishull mundësish” me taksa të ulëta, energji të gjelbër, turizëm në rritje dhe klimë të favorshme për biznesin. “Ejani të punojmë bashkë për suksesin”, u shpreh ai, duke shtuar se Shqipëria është porta më e afërt e Turqisë drejt Bashkimit Europian dhe një partner i qëndrueshëm në siguri, energji, turizëm e teknologji. Ai e përkufizoi marrëdhënien shqiptaro-turke si “një urë me këmbët ngulur në të ardhmen”, me objektivin për të ndërtuar “një autostradë suksesi midis Bosforit dhe Adriatikut”.
Fokusi i Forumit: katër sektorë strategjikë
Forumi i Investimeve Shqipëri–Turqi 2025 synon të tërheqë investime të reja në katër sektorë me potencial të lartë zhvillimi: ndërtimi, teknologjia e informacionit dhe komunikimit (ICT/BPO), turizmi, bujqësia dhe industria ushqimore. Ngjarja përfshin panele diskutimi dhe takime të drejtpërdrejta mes bizneseve (B2B) dhe bizneseve me institucione (B2G), duke krijuar mundësi konkrete për bashkëpunime dhe nënshkrim marrëveshjesh.
AIDA: Shqipëria, një destinacion i qëndrueshëm investimi
Drejtoresha ekzekutive e Agjencisë Shqiptare të Zhvillimit të Investimeve (AIDA), Laura Saro, theksoi se forumi është një platformë kyçe për promovimin e potencialeve të Shqipërisë si destinacion i qëndrueshëm për investime të huaja dhe për forcimin e lidhjeve ekonomike me Turqinë. Sipas saj, interesimi i lartë i biznesit turk tregon besimin në klimën e re të investimeve që ofron vendi.
