Çmimet e reja të pronave nga 1 janari 2026: Bregdeti mbi 2 mijë euro/m2, Shkodra më e lira
Nga 1 janari 2026, pronat në Shqipëri do të kushtojnë më shumë.
Ministria e Financave ka publikuar projektligjin që përcakton çmimet e reja referuese për 12 qarqet e vendit, përjashtuar Bashkinë Tiranë, me rritje të ndjeshme në zonat bregdetare dhe urbane.
Bregdeti, më i shtrenjti në vend
Sipas draftit, qarku më i kushtueshëm mbetet Vlora, ku çmimet arrijnë deri në 200 mijë lekë/m² (rreth 2,000 euro/m²) në zonën 7 të qytetit, që përfshin ishullin e Sazanit. Në Durrës, kufiri maksimal është po ashtu 200 mijë lekë/m² në zonën 13, ndërsa më i ulëti regjistrohet në Shijak me 43 mijë lekë/m².
Qarku i Lezhës ka çmime nga 36 mijë lekë/m² në Milot në 70 mijë lekë/m² në Shëngjin, ndërsa në Elbasan variojnë nga 40 mijë lekë/m² në Belsh deri në 60 mijë lekë/m² në qytetin e Elbasanit.
Rajonet më të përballueshme
Shkodra mban vendin e parë si qarku më i lirë për blerjen e pasurive të paluajtshme. Çmimet lëvizin nga 10,500 lekë/m² në Fushë-Arrëz deri në 75,000 lekë/m² në qytetin e Shkodrës. Në Berat, çmimet variojnë nga 26,000 lekë/m² në Skrapar deri në 55,000 lekë/m² në qendrën e qytetit.
Edhe Gjirokastra mbetet ndër zonat më të lira, me çmime nga 17,000 lekë/m² në Memaliaj deri në 63,000 lekë/m² në qytetin e Gjirokastrës.
Tirana dhe zonat përreth
Projektligji nuk ndryshon çmimet aktuale për Bashkinë Tiranë, por përcakton referenca të reja për bashkitë përreth: Rrogozhina (46 mijë lekë/m²), Kavaja dhe Vora me çmime mesatare, ndërsa Kamza mban nivelin më të lartë me 75 mijë lekë/m². Aktualisht, brenda Tiranës çmimet referencë arrijnë deri në 228 mijë lekë/m² në njësinë nr. 5.
Tendenca dhe metodologjia e re
Sipas Ministrisë së Financave, çmimet janë përllogaritur në bazë të shitblerjeve të katër viteve të fundit, vendndodhjes, zhvillimit urban dhe prirjeve të tregut imobiliar. Ato vlejnë për pasuri të llojeve të ndryshme – apartamente, ndërtesa, garazhe, njësi tregtare apo bodrume.
Për njësitë tregtare dhe shërbimet, çmimet janë 1.5 herë më të larta se vlera e referencës për zonën, ndërsa në Tiranë dyfishohen. Bashkitë do të kenë të drejtë të rregullojnë çmimet me ±30% nga referenca bazë.
Pasojë: rritje e kostos së pronës dhe taksave
Ekspertët e tregut parashikojnë që ndryshimi i ri do të ndikojë drejtpërdrejt në çmimin e shitblerjeve, taksën e pasurisë dhe koston e regjistrimit të pronave. Bregdeti pritet të mbetet zona më e shtrenjtë e vendit, ndërsa qarqe si Shkodra dhe Dibra mbeten më të përballueshme për blerësit.
