Tirana e tejkalon dhe Milanon, ndër 6 qytetet më të shtrenjta në Europë për blerjen e pronës
Tirana renditet ndër 6 qytetet më të shtrenjta në Europë për blerjen e banesave, duke tejkaluar edhe Milanon, sipas raportit të Numbeo 2025.
18 vite për të blerë një apartament në kryeqytet
Sipas të dhënave të Numbeo, një familjeje në Tiranë i duhen mesatarisht 18 vite për të blerë një apartament 90 m², krahasuar me 15.3 vite një vit më parë. Ky tregues e pozicionon Tiranën në vendin e gjashtë në Europë dhe të 37-tin në botë, si një nga qytetet më të papërballueshme për blerjen e pronës. Në Milano, për të blerë një apartament duhen 16 vite, çka e vendos Tiranën për herë të parë përpara këtij qyteti italian.
Krahasimi me qytetet europiane dhe rajonin
Në Europë, qytetet më të shtrenjta për blerjen e një prone mbeten Londra (19.2 vite), Lisbona (19.8 vite) dhe Spliti (18 vite). Pas Tiranës renditen Beogradi me 16.6 vite dhe Parisi me 15.3 vite. Në rajon, Prishtina kërkon 14.6 vite për blerjen e një banese, ndërsa në Sarajevë duhen 15.4 vite.
Numbeo llogarit përballueshmërinë përmes raportit çmim ndaj të ardhurave (Price-to-Income Ratio), i cili tregon sa vite pune duhen për blerjen e një banese mesatare në qytet, duke marrë parasysh çmimet e tregut dhe të ardhurat familjare neto.
Çmimet në rritje dhe të ardhurat në vendnumëro
Sipas raportit “Deloitte Property Index 2025”, Shqipëria u përfshi për herë të parë në listën e 25 vendeve europiane, me një çmim mesatar prej 1,620 euro për metër katror — në rritje me 16.6% krahasuar me një vit më parë. Tirana shënon një mesatare prej 2,000 euro/m², Vlora 2,400 euro/m² dhe Durrësi 1,350 euro/m². Në zonat qendrore të Tiranës, si ish-Blloku dhe rreth Sheshit “Skënderbej”, çmimet arrijnë deri në 3,500 euro për metër katror.
Ekspertët e tregut theksojnë se rritja e çmimeve të apartamenteve, e pandjekur nga rritja e të ardhurave mesatare, po e bën pronën gjithnjë e më pak të përballueshme për familjet shqiptare, veçanërisht për të rinjtë që kërkojnë të blejnë banesën e parë.
Tirana ndër tregjet më të shtrenjtë në Europën Juglindore
Vetëm disa qytete si Londra, Lisbona dhe Spliti e kalojnë Tiranën në treguesin e përballueshmërisë, ndërsa kryeqyteti shqiptar lë pas metropole të tilla si Milano, Parisi dhe Beogradi. Ky pozicionim reflekton presionin e rritur në tregun e pasurive të paluajtshme, ku kërkesa e lartë dhe investimet spekulative kanë ndikuar në rritjen e shpejtë të çmimeve.
