Taksat që do të ndryshojnë në 2026: Ndërhyrje në TVSH dhe akciza, sektorët që preken

29-10-2025

Qeveria shqiptare po përgatit një sërë ndryshimesh fiskale që do të hyjnë në fuqi në vitin 2026, duke prekur kryesisht Tatimin mbi Vlerën e Shtuar (TVSH) dhe akcizat.

Ministria e Financave është në fazën përfundimtare të hartimit të buxhetit dhe paketës fiskale, e cila pritet të paraqitet për diskutim në Kuvend brenda këtij viti.

Analiza e sistemit tatimor dhe heqja e përjashtimeve

Sipas Strategjisë Afatmesme të të Ardhurave 2024–2027, një nga synimet kryesore është rishikimi i politikave tatimore për TVSH-në, me qëllim heqjen e përjashtimeve që konsiderohen të panevojshme dhe reduktimin e normave të veçanta që nuk kanë më efekt ekonomik të justifikueshëm. Në dokument theksohet se përjashtimet nga TVSH-ja në import dhe brenda vendit janë dhënë mbi 10 apo 15 vite më parë, në një kohë kur vonesat e rimbursimit ishin problematike për investitorët. Tashmë, me funksionimin normal të skemës së rimbursimeve, arsyet për vazhdimin e këtyre përjashtimeve janë eliminuar.

Normat e reduktuara të TVSH-së në rishikim

Ligji aktual i TVSH-së parashikon disa norma të reduktuara:

6% për turizmin, librat dhe shërbimet reklamuese në media;
10% për inputet bujqësore.

Këto norma pritet të rishikohen në kuadër të paketës fiskale 2026, në mënyrë që të harmonizohen me praktikat e Bashkimit Evropian dhe të reduktohet efekti i tyre në të ardhurat buxhetore. Ministria e Financave, me mbështetjen teknike të Fondit Monetar Ndërkombëtar (FMN), ka kryer analiza kosto–përfitimi për disa prej këtyre përjashtimeve, për të vlerësuar ndikimin e tyre ekonomik dhe fiskal.

Ndryshime në politikën e akcizave

Përveç TVSH-së, qeveria pritet të ndërhyjë edhe në politikën e akcizave, duke e përafruar më shumë me nivelet minimale të Bashkimit Evropian. Ndryshimet do të synojnë:

Reduktimin e sasive të patatueshme të pijeve alkoolike që përdoren për konsum personal, sidomos për produktet tradicionale si rakia dhe vera e prodhuar në vend.
Unifikimin e niveleve të akcizës për mallrat që aktualisht trajtohen me tarifa të diferencuara.
Heqjen e përjashtimeve dhe rimbursimeve ekzistuese nga akciza në disa industri, duke i zëvendësuar me subvencione direkte për prodhuesit e prekur.

Kalendari i rritjes së akcizës për duhanin mbetet në fuqi

Ndërkohë, për produktet e duhanit, mbetet në fuqi kalendari i rritjes së akcizës 2022–2026, i cili do të reflektohet me rritje të çmimeve të paketave në treg gjatë vitit 2026. Ky ndryshim është pjesë e politikës afatgjatë të harmonizimit të akcizës me direktivat e BE-së dhe të uljes së konsumit të duhanit.

Objektivi: më shumë të ardhura dhe sistem më efikas

Qeveria synon që me këto ndërhyrje të krijojë një sistem fiskal më të drejtë dhe më efikas, duke eliminuar përjashtimet që krijojnë pabarazi mes sektorëve dhe duke rritur transparencën në mbledhjen e të ardhurave. Këto masa pritet të ndikojnë në mënyrë të ndjeshme mbi sektorët e turizmit, bujqësisë, medias dhe industrisë së pijeve alkoolike, të cilët aktualisht përfitojnë nga normat e reduktuara të TVSH-së apo përjashtimet nga akciza.

Burimi: Scan