Zgjedhjet në 5 bashki, nesër heshtje zgjedhore, KQZ nis shpërndarjen e materialeve zgjedhore
Pesë bashki të vendit Vlora, Berati, Tepelena, Cërriku dhe Mati votojnë të dielën për kryebashkiakët e rinj, ndërsa sot përfundon zyrtarisht fushata elektorale.
Fushatë e qetë dhe pa praninë e liderëve politikë
Komisioni Qendror i Zgjedhjeve ka nisur shpërndarjen e materialeve zgjedhore në të pesë bashkitë, ndërsa e shtuna do të jetë dita e heshtjes zgjedhore. Fushata e këtij procesi është cilësuar si më e qeta e viteve të fundit, pasi asnjë nga liderët kryesorë politikë, Edi Rama dhe Sali Berisha, nuk janë shfaqur në asnjë miting apo takim elektoral. E vetmja dalje publike e Ramës ka qenë në podcastin “Flasim”, ku foli për sfidat dhe kandidaturat socialiste.
Rreth 334 mijë qytetarë me të drejtë vote
Të dielën pritet të votojnë 334,539 qytetarë për të zgjedhur kryetarët e rinj të bashkive. Vlora ka numrin më të madh të votuesve, me rreth 172 mijë, pasuar nga Berati me mbi 82 mijë, Cërriku me afro 39 mijë, Mati me 29 mijë dhe Tepelena me 12,600 votues të regjistruar.
Garat elektorale në çdo bashki
Në Vlorë, kandidatja socialiste Brunilda Mersini, që hoqi dorë nga mandati i deputetes, garon përballë Dionis Sotës, kandidatit të mbështetur nga Partia Demokratike, dhe Gjergj Nikës nga Këshilli Bashkiak.
Në Berat, gara zhvillohet mes Ervin Cecës (PS) dhe Pavlo Shkarpës.
Në Mat, kandidati socialist Altin Bojni përballet me të pavarurën Suzana Pasha dhe Eduart Brahilikën, të mbështetur nga opozita.
Në Cërrik, Florenc Doka i PS-së do të ketë përballë Amarildo Hoxhën, i mbështetur nga PD, dhe Eligert Himën nga “Lëvizja Shqipëria Bëhet”.
Në Tepelenë, përballja do të jetë mes Gramoz Sakos (PS) dhe të pavarurit Gabriel Guma.
Mandat i shkurtër për kryebashkiakët e rinj
Kryetarët që do të zgjidhen në këto zgjedhje do të kenë një mandat të shkurtuar prej vetëm një viti e gjysmë, deri në zgjedhjet e përgjithshme vendore të pranverës së vitit 2027. Procesi konsiderohet një test për forcat politike përpara garave të ardhshme elektorale.
