TAP do zgjerojë stacionin në Bilisht për t’ju përgjigjur rritjes potenciale të transportit të gazit
Trans Adriatic Pipeline (TAP) ka paraqitur planin për zgjerimin e stacionit në Bilisht, për t’u përgatitur ndaj një rritjeje të mundshme të kapacitetit të transportit të gazit.
Projekti i zgjerimit dhe elektrifikimi i stacionit
Sipas dokumenteve të dorëzuara pranë autoriteteve, zgjerimi i stacionit ACS02 në Bilisht është parashikuar që në projektin origjinal të vitit 2013, por tashmë do të konkretizohet me ndërtimin e një stacioni të plotë kompresorësh. Në fazën e parë, stacioni do të përfshijë pesë kompresorë, secili me kapacitet 15 megavat, për të mundësuar rritjen e rrjedhës së gazit deri në 20 BCMA.
TAP thekson se projekti i ri përditëson planin teknik duke zëvendësuar njësitë me gaz me kompresorë elektrikë. Kjo nënkupton ndërtimin e një nënstacioni elektrik të tensionit të lartë dhe lidhjen e tij me rrjetin kombëtar të energjisë elektrike. “Elektrifikimi i stacionit do të ulë ndjeshëm ndotjen dhe do të përputhet me objektivat e tranzicionit energjetik,” thuhet në dokument.
Kapaciteti i transportit dhe testimi i tregut
Aktualisht, TAP operon me kapacitet 10 BCMA, megjithëse është ndërtuar për të përballuar deri në 20 BCMA. Zgjerimi i stacionit të Bilishtit do të mundësojë rritjen graduale të këtij kapaciteti, në varësi të rezultateve të testimit të tregut për kërkesën e shtuar të gazit në Europë dhe Ballkan.
Roli strategjik i TAP në Korridorin Jugor të Gazit
Gazsjellësi TAP është hallka përfundimtare e Korridorit Jugor të Gazit që sjell gazin natyror nga fushat Shah Deniz II në Azerbajxhan drejt Europës. Ai lidhet me gazsjellësin Trans Anatolian (TANAP) në kufirin greko-turk, kalon nëpër Greqi dhe Shqipëri, përshkon detin Adriatik dhe përfundon në Itali. Me gjatësi 878 kilometra, TAP ka nisur operimin tregtar në fund të vitit 2020 dhe mbetet një projekt kyç për diversifikimin e furnizimeve me gaz të BE-së.
Aksionerët e TAP-it janë BP, SOCAR, Snam, Fluxys dhe Enagás, secili me nga 20% të aksioneve.
