Përfaqësuesja e BE: Qeveria shqiptare duhet të shtojë shpenzimet për kërkim dhe zhvillim
Përfaqësuesja e BE-së në Shqipëri, Ritva Heikkinen, ka kërkuar nga qeveria rritje të përpjekjeve për investime në kërkim dhe zhvillim.
BE kërkon rritje të financimit për inovacionin
Gjatë një vizite në disa projekte të financuara nga BE në kuadër të programit EU4Innovation, Heikkinen, së bashku me Ambasadorin e Suedisë në Shqipëri, Niklas Ström, theksuan se Shqipëria duhet të përshpejtojë investimet në kërkim, zhvillim dhe teknologji. Sipas saj, inovacioni është çelësi për rritjen ekonomike afatgjatë, rritjen e konkurrueshmërisë dhe krijimin e vendeve të punës cilësore për të rinjtë.
“Qeveria shqiptare duhet të dyfishojë përpjekjet për të përmbushur objektivin e saj për të investuar 1% të PBB-së në kërkim dhe zhvillim deri në vitin 2030. Inovacioni është gjithashtu në qendër të Planit të ri të Rritjes së BE-së, që fokusohet te zhvillimi i aftësive, arsimi dhe krijimi i mundësive të reja pune,” tha Heikkinen.
Fokus tek bashkëpunimi midis universiteteve dhe bizneseve
Përfaqësuesja e BE-së nënvizoi se Shqipëria duhet të forcojë bashkëpunimin mes universiteteve dhe sektorit privat për të ndërtuar një ekosistem inovacioni funksional. BE-ja, përmes programit EU4Innovation, ka ofruar 10 milionë euro për nxitjen e kërkimit shkencor dhe zhvillimit teknologjik, si dhe për mbështetjen e startupeve dhe sipërmarrjeve të reja.
“Shqipëria ka një shpirt të fortë sipërmarrës dhe histori frymëzuese suksesi që tregojnë se kur talenti takon mundësinë, inovacioni lulëzon. BE-ja do të vazhdojë të mbështesë inovatorët shqiptarë për të ndërtuar një ekonomi të qëndrueshme dhe konkurruese,” shtoi ajo.
Programi EU4Innovation dhe sektorët prioritarë
Projekti EU4Innovation bashkëfinancohet nga Bashkimi Evropian, Ministria Federale Gjermane për Bashkëpunim Ekonomik dhe Zhvillim (BMZ) dhe Agjencia Suedeze për Bashkëpunim Ndërkombëtar (Sida), ndërsa zbatohet nga GIZ Shqipëri dhe Ambasada Suedeze në Tiranë. Ndër sektorët prioritarë janë turizmi, bujqësia, ekonomia e gjelbër, energjia inteligjente ndaj klimës dhe teknologjia e informacionit dhe komunikimit.
