Turizmi, në tetor hyrjet e të huajve u rritën me 19.3 për qind
Tetori shënoi rikthim të fortë të turistëve të huaj, me rritje dyshifrore pas një vere me luhatje.
Hyrjet e të huajve dhe shqiptarëve në tetor
Turizmi ka shfaqur një ringritje të ndjeshme gjatë tetorit, me 908.642 hyrje të shtetasve të huaj, një rritje prej 19.3 për qind krahasuar me tetorin 2024. Të dhënat e Lëvizjes së Shtetasve nga INSTAT tregojnë se nga janari deri në tetor kanë hyrë gjithsej 11.1 milionë të huaj në Shqipëri.
Në të njëjtin muaj, 668.623 shtetas shqiptarë kanë hyrë në vend, me një rritje prej 7.7 për qind, ndërsa 659.405 janë regjistruar si dalje, në rritje me 5.6 për qind. Daljet e të huajve arritën në 886.175, me rritje prej 24.4 për qind krahasuar me një vit më parë. Sipas INSTAT, 95 për qind e hyrjeve të turistëve të huaj vijnë nga Evropa, ku Evropa Jugore përbën 73 për qind të tyre, e ndjekur nga Evropa Perëndimore me 12 për qind dhe Evropa Qendrore/Lindore me 6 për qind.
Luhatjet gjatë vitit dhe sfidat e sezonit turistik
Gjatë vitit, turizmi ka qenë i karakterizuar nga luhatje të vazhdueshme. Pas dy vitesh rritjeje të fortë, sezoni veror 2025 solli një ngadalësim të ndjeshëm për shkak të problemeve të raportuara në disa zona turistike.
Çështjet e furnizimit me energji dhe ujë, menaxhimi i mbetjeve, zhurmat nga ndërtimet dhe aktivitetet e kantiereve krijuan pakënaqësi te vizitorët, të reflektuara në vlerësime negative online dhe anketa të agjencive të huaja. Rritja e çmimeve në prag të sezonit, sidomos në maj dhe qershor, ndikoi te turistët me buxhet të ulët, ndërsa zhvlerësimi i euros ndikoi te pushuesit nga Kosova, njëkohësisht me efektet e liberalizimit të vizave.
Pritshmëritë për vitin e ardhshëm
Turoperatorët kanë kërkuar masa për të shmangur problemet e përsëritura dhe për të ruajtur qëndrueshmërinë e sektorit, i cili po shfaq shenja të hershme lëkundjeje. Parashikimet sugjerojnë që viti i ardhshëm mund të ndjekë të njëjtën ecuri si 2025, me rritje më të moderuar por të stabilizuar, nëse menaxhimi i sfidave kryesore përmirësohet.
