FMN i kërkon Bankës së Shqipërisë të tërhiqet nga ndërhyrjet në kursin e këmbimit
FMN rekomandon më shumë fleksibilitet të kursit të këmbimit dhe më pak ndërhyrje nga Banka e Shqipërisë.
Fondi Monetar Ndërkombëtar vlerëson se Banka e Shqipërisë duhet të pakësojë ndërhyrjet në tregun valutor dhe të lejojë që kursi i këmbimit të funksionojë si amortizator goditjesh, duke theksuar se akumulimi i mëtejshëm i rezervave duhet të bazohet në analizë kosto–përfitim. Sipas FMN-së, vlerësimi i kursit real të Lekut ndikohet kryesisht nga faktorë themelorë, ndërsa flukset spekulative kanë rol modest.
Kërkohet fleksibilitet më i madh i kursit të këmbimit
FMN rekomandon që Banka e Shqipërisë të mbështetet te normat e interesit për stabilitetin e çmimeve, ndërsa ndërhyrjet në tregun valutor të rezervohen për raste të rralla të goditjeve jo-themelore, duke paralajmëruar se përfitimet nga rritja e rezervave duhen peshuar ndaj kostove dhe humbjeve të mundshme nga rivlerësimi valutor.
Kursi Euro-Lek dhe ndërhyrjet e bankës qendrore
Kursi i këmbimit Euro-Lek ka vijuar rënien dhe në tetor preku nivelin historik 96.6 lekë, por ndërhyrjet e Bankës së Shqipërisë kanë ngadalësuar zhvlerësimin e monedhës europiane, teksa rënia vjetore është ulur në 1.6%. Guvernatori Sejko ka deklaruar se nëntë muajt e parë të vitit u blenë rreth 800 milionë euro valutë, ndërsa në vitin 2024 totali ishte 933 milionë euro, duke treguar ofertë të lartë të Euros që do ta kishte çuar kursin edhe më poshtë pa këto blerje.
Kosto të larta për shkak të rezervave rekord
Banka e Shqipërisë raportoi rezerva valutore rekord prej 7.27 miliardë eurosh në fund të shtatorit, një instrument i rëndësishëm për amortizimin e goditjeve, por që ka sjellë kosto të ndjeshme në bilanc për shkak të forcimit të Lekut; vetëm në vitin 2024 humbjet neto nga kursi i këmbimit ishin 13.5 miliardë lekë, megjithëse 63% më të ulëta se një vit më parë.
