Qeveria miraton bonusin e fundvitit për pensionistët
Këshilli i Ministrave miratoi shpërblimin e fundvitit për 762,740 përfitues, me dy fasha bonusësh prej 15,000 dhe 10,000 lekësh.
Përfituesit dhe shpërndarja
Qeveria ka vendosur shpërblimin e fundvitit 2025 për pensionistët dhe kategori të tjera përfituese, me një total prej 762,740 personash. Nga këta, 640,325 janë pensionistë në pension pleqërie dhe 2,322 marrin pension social, ndërsa pjesa tjetër përfshin 65,232 përfitues të pensionit të invaliditetit, 48,087 përfitues të pensionit familjar dhe 6,774 persona me trajtime të veçanta financiare si minatorë të nëntokës, punonjës të ish-ndërmarrjeve ushtarake dhe ushtarakë në pension të parakohshëm.
Sipas vendimit, rreth 540,959 persona do të marrin një shpërblim prej 15,000 lekësh, duke përfshirë pensionistë me pension deri në 20,000 lekë, përfituesit e pensionit social, invalidët e punës, pensionet familjare dhe trajtime të posaçme. Ndërkohë, 221,781 përfitues do të marrin bonusin prej 10,000 lekësh, kryesisht pensionistë me pension mbi 20,000 lekë dhe kategori me trajtime të veçanta financiare në nivele më të larta.
Afatet dhe mënyra e përfitimit
Shpërblimi do të paguhet gjatë muajit dhjetor 2025 dhe, nëse nuk tërhiqet brenda këtij afati, mund të përfitohet deri më 30 qershor 2026, pas së cilës parashkruhet. Zbatimi i vendimit do të kryhet nga Ministria e Ekonomisë dhe Inovacionit, Ministria e Financave, Instituti i Sigurimeve Shoqërore dhe Posta Shqiptare.
