Kripto-asetet, gati projektligji për rregullimin e tregjeve, si do funksionojë
Qeveria ka nxjerrë për konsultim publik një projektligj të ri që rregullon tregjet e kripto-aseteve, i përafruar me standardet e BE.
Çfarë synon ligji i ri?
Sipas relacionit shoqërues, projektligji mbulon të gjitha veprimtaritë që lidhen me emetimin e kripto-aseteve dhe tokenave të parasë elektronike, si dhe ofrimin e shërbimeve të tregtimit, këmbimit, kujdestarisë, ekzekutimit të urdhrave, këshillimit dhe administrimit të portofolave. Qëllimi është krijimi i një tregu më të qartë, të rregulluar dhe më të mbrojtur për konsumatorët dhe investitorët.
Kërkesat për subjektet: kapital minimal dhe siguri kibernetike
Ofruesit e shërbimeve do t’u nënshtrohen kritereve të rrepta, të ngjashme me ato të tregjeve financiare tradicionale. Projektligji kërkon mbajtjen e kapitalit minimal, rregulla të qarta të qeverisjes, shmangien e konflikteve të interesit, standarde të sigurisë kibernetike dhe politike të mbrojtjes së konsumatorit. Gjithashtu, zbatimi i plotë i masave kundër pastrimit të parave do të jetë i detyrueshëm.
Përafrimi me direktivat evropiane
Kuadri i ri është ndërtuar mbi modelet MIFID II dhe EMD2, duke i vendosur ofruesit e shërbimeve me kripto-asete në të njëjtat standarde si institucionet financiare që operojnë me instrumente klasike. Kjo do të sjellë transparencë më të lartë, dokumente informimi (whitepaper) më të detajuara dhe rregulla më të rrepta marketingu.
Kush do të mbikëqyrë tregun?
Projektligji parashikon që Autoriteti i Mbikëqyrjes Financiare dhe Banka e Shqipërisë të jenë institucionet përgjegjëse për kontrollin dhe zbatimin e rregullave të reja. Ky mekanizëm pritet të rrisë besimin e përdoruesve dhe të ruajë stabilitetin financiar.
Hapësira për inovacion dhe integrim në tregjet evropiane
Përtej rregullimit, projektligji synon të mbështesë inovacionin në teknologjitë e reja, duke krijuar kushte të barabarta konkurruese me tregun evropian. Ofruesit shqiptarë të shërbimeve do të kenë mundësi të operojnë më lehtë në tregun e përbashkët, duke tërhequr investime dhe duke integruar ekosistemin lokal të kripto-aseteve në zinxhirët evropianë të vlerës.
