BB paralajmëron: Punësimi dhe pagat reale në Shqipëri do të bien deri në vitin 2030
Banka Botërore parashikon ngadalësim të tregut të punës dhe rënie të të ardhurave reale nga puna për Shqipërinë deri në fund të dekadës.
Punësimi mbetet në vendnumëro
Një analizë e re globale e Bankës Botërore mbi ndikimin e klimës në punësim tregon se tregu shqiptar i punës nuk po krijon vende të reja pune me ritmin e nevojshëm. Punësimi parashikohet të mbetet i pandryshuar deri në vitin 2030, i ndikuar nga plakja e popullsisë, emigracioni i lartë dhe produktiviteti i ngadalësuar. Sipas Bankës, sfidat strukturore të ekonomisë e bëjnë tregun e punës të brishtë, duke e ekspozuar ndaj çdo krize apo reforme të papërfunduar.
Pagat reale pritet të bien
Të ardhurat nga puna do të vuajnë më tej presionet e produktivitetit të ulët, me një projeksion rënieje prej -0.1% deri në vitin 2030. Pagat reale pritet të mbeten të ulëta dhe të rriten më ngadalë se pritshmëritë, duke rritur presionet sociale dhe prirjen për emigrim. Sektorët me vlerë të shtuar të ulët dhe niveli i lartë i informalitetit mbeten faktorë kyç që frenojnë rritjen e të ardhurave familjare.
Shqipëria, mesatarisht e ekspozuar por pa dinamizëm ekonomik
Në krahasim me grupin e vendeve me të njëjtin nivel zhvillimi, Shqipëria pozicionohet në segmentin me luhatje të moderuara. Megjithatë, Banka Botërore thekson se ekonomia shqiptare nuk po arrin të gjenerojë fitime të reja produktiviteti dhe të përfitojë nga reformat transformuese. Deri në vitin 2030, pritet një rritje e ngadaltë, pa kriza të thella, por edhe pa përmirësim të dukshëm të standardeve të jetesës.
Reformat e nevojshme
Si një vend me emigracion të lartë, Shqipëria duhet të përqendrojë reformat në rritjen e produktivitetit të punës dhe zhvillimin e kapitalit njerëzor. Banka Botërore sugjeron investime të thella në arsim, teknologji dhe aftësi profesionale, për të krijuar mundësi më të mira pune dhe për të rifituar dinamizmin e tregut.
