Ministri i Financave: Pagat rriten nga 2.5 për qind deri në 25 për qind, përfitojnë të gjithë
Qeveria parashikon indeksim 2.5% për të gjithë administratën në vitin 2026, ndërsa disa kategori do të përfitojnë rritje page deri në 25%.
Indeksim për të gjithë administratën
Ministri i Financave Petrit Malaj bëri të ditur se viti 2026 sjell për herë të parë një indeksim të përgjithshëm të pagave në administratën publike me 2.5%. Përfitues janë të gjithë punonjësit pa përjashtim, nga shoferët deri te drejtuesit më të lartë, një masë që synon të ruajë fuqinë blerëse përballë inflacionit.
Kush do të ketë rritje më të madhe
Përveç indeksimit, disa kategori specifike do të përfitojnë rritje të konsiderueshme page. Malaj theksoi se punonjësit e shërbimeve mbështetëse – si shoferë, sanitarë, arkivistë e punonjës protokolli – do të kenë rritje të dedikuar. Rritje të ndjeshme përfitojnë edhe infermierët, mjekët dhe punonjësit e Policisë së Shtetit, të cilëve për herë të parë do t’u njihet vjetërsia në punë. Për këto kategori, rritja mund të arrijë deri në 25%.
Buxheti dhe ritmi i indeksimit
Fondi total i parashikuar për indeksimin dhe rritjen e pagave arrin në 100 milionë euro dhe parashikohet të hyjë në fuqi nga janari. Indeksimi i pagave do të zbatohet një herë në dy vite, çka nënkupton se raundi i radhës do të jetë në vitin 2028, duke siguruar një mekanizëm periodik për mbrojtjen e të ardhurave nga efektet e inflacionit.
