Fondet e investimit, rritet vlera e aseteve dhe numri i anëtarëve në 9-mujorin 2025
Tregu i Sipërmarrjeve të Investimeve Kolektive (SIK) vijoi zgjerimin e tij gjatë nëntëmujorit të parë të vitit 2025, duke reflektuar një rritje të qëndrueshme të interesit të investitorëve dhe forcim të besimit në instrumentet e tregut financiar.
Sipas të dhënave të Autoritetit të Mbikëqyrjes Financiare, më 30 shtator 2025 në treg operonin gjashtë shoqëri administruese të licencuara, ku katër prej tyre me kapital vendas dhe dy me kapital të huaj, të cilat administronin gjithsej 16 fonde investimi, përfshirë katër fonde alternative. Ky portofol i zgjeruar produktesh mbetet një faktor kyç në rritjen e pjesëmarrjes së investitorëve dhe diversifikimit të kursimeve.
Vlera neto e aseteve të tregut arriti në 68.13 miliardë lekë, ose rreth 704 milionë euro, një rritje prej 11.03% krahasuar me fundin e vitit 2024.
Ky është një nga ritmet më të qëndrueshme të rritjes në sektor, i udhëhequr nga kërkesa e lartë për instrumente me rrezik të ulët dhe nga normat relativisht të ulëta të interesit në depozitat tradicionale. Vetëm fondet me pjesëmarrje të hapur dhe ofertë publike regjistruan një vlerë prej 62 miliardë lekësh, me një rritje prej 11.69% brenda të njëjtës periudhë.
Numri i investitorëve gjithashtu u rrit ndjeshëm. Më 30.09.2025, në treg ishin të regjistruar 41,686 investitorë, me një rritje prej 10.32% krahasuar me 31.12.2024, duke treguar një orientim më të gjerë të individëve dhe bizneseve drejt fondeve të investimit si alternativë e mençur për ruajtjen dhe rritjen e kapitalit.
Sjellja e investitorëve vijon të karakterizohet nga preferenca për stabilitet, duke bërë që investimet të jenë të fokusuara kryesisht te titujt qeveritarë, të cilët zënë 81.21% të portofolit të përgjithshëm. Gjithashtu, rreth 6.24% e aseteve janë të investuara në tregjet financiare ndërkombëtare, duke sinjalizuar një zgjerim të ngadaltë të diversifikimit të tregut.
Ndër fondet më të mëdha në treg, Raiffeisen PRESTIGJ dominon me 42,974 milionë lekë në asete neto dhe 33,951 anëtarë, i ndjekur nga Raiffeisen Vizion me mbi 11.4 miliardë lekë dhe Raiffeisen Invest Euro me 4.5 miliardë lekë. Fondet alternative si Sea Land dhe Green View, megjithëse me numër minimal investitorësh, paraqesin asete të konsiderueshme, respektivisht 3,355 dhe 2,601 milionë lekë, duke dëshmuar interesin për produkte të strukturuara dhe me strategji të ndryshme investimi.
Fondet e tjera si Credins Premium, WVP Global, ABI EIA, Raiffeisen MIX dhe Albsig Standard vijojnë të mbajnë pozicionet e tyre në treg, duke kontribuar në rritjen e përgjithshme të aseteve dhe të bazës së investitorëve.
Performanca pozitive e tregut SIK në këtë nëntëmujor, e kombinuar me rritjen e kërkesës për instrumente financiare të qëndrueshme dhe rritjen e alternativave të ofruara nga shoqëritë administruese, pritet të çojë asetet neto përtej pragut të 70 miliardë lekëve deri në fund të vitit.
Me forcimin e standardeve të transparencës, edukimin financiar dhe diversifikimin e fondeve, tregu i fondeve të investimit në Shqipëri mbetet një prej segmenteve me potencialin më të madh të rritjes në sektorin financiar.
Burimi:Ekofin.al
Më të lexuarat
