Pas 2 vitesh, BE nis heqjen e disa masave ndëshkuese ndaj Kosovës
Bashkimi Evropian ka filluar heqjen graduale të disa masave ndëshkuese ndaj Kosovës, duke liruar fonde për projekte konkrete, ndërsa pjesa tjetër e masave mbetet ende në fuqi.
Lirohen fonde për projektet IPA
Lajmi u bë i ditur nga Zëvendëskryeministri i parë i Kosovës në detyrë, Besnik Bislimi, pas pranimit të një letre zyrtare nga Drejtori i Përgjithshëm për Zgjerim i Bashkimit Evropian, Gert Jan Koopman. Sipas kësaj letre, janë liruar fondet për katër projekte në kuadër të programeve IPA, me një vlerë totale prej 34.6 milionë eurosh. Vendimi lidhet me atë që BE e ka vlerësuar si “transferim të duhur të pushtetit lokal në veri”, pas zgjedhjeve lokale të 12 tetorit.
BE konfirmon heqjen e pjesshme të masave
Në letrën drejtuar autoriteteve kosovare, Koopman thekson se Komisioni Evropian do të heqë disa nga masat që lidhen me programet e fondeve të BE-së dhe kontraktimin e projekteve prioritare, në përputhje me Komunikimin e Zgjerimit 2025.
Kosova kërkon heqje të plotë të masave
Zëvendëskryeministri Besnik Bislimi e cilësoi këtë hap si pozitiv, por theksoi se Kosova pret heqjen e plotë të masave ndëshkuese. Sipas tij, pas transferimit të pushtetit në katër komunat në veri në mënyrë ligjore dhe paqësore, nuk ka më arsye që masat të mbeten në fuqi.
BE mban ende rezerva
Sipas raportimeve nga Prishtina, Bashkimi Evropian nuk pritet t’i heqë të gjitha masat gjatë këtij viti. Komisioni Evropian i ka kërkuar Kosovës të paraqesë projekte të reja për përdorimin e fondeve të IPA-s për periudhën 2026–2027, të cilat do të duhet të miratohen nga Komisioni dhe vendet anëtare. Ministrat e BE-së, në diskutimet e fundit në Bruksel, kanë kërkuar përshpejtim të reformave dhe zbatim të marrëveshjeve me Serbinë, përfshirë formimin e Asociacionit të komunave me shumicë serbe.
Kosova ende pa status kandidati
Kosova mbetet i vetmi vend i Ballkanit Perëndimor pa status kandidati për anëtarësim në BE, ndonëse ka aplikuar që në dhjetor 2022. Presidentja Vjosa Osmani ka udhëtuar në Bruksel për të marrë pjesë në Samitin BE–Ballkani Perëndimor, ku heqja e masave ndaj Kosovës dhe avancimi i procesit të integrimit pritet të jenë ndër temat kryesore të diskutimit.
