Turizmi rritje me 55.4 për qind në tetor, gjermanët dhe italianët shënuan numrin më të lartë
Tetori solli rritje të fortë të vizitorëve të huaj, me Gjermaninë dhe Italinë të dytat pas Kosovës.
Tetori ka shënuar një rritje të dukshme të vizitorëve të huaj në strukturat akomoduese në vend, ku krahasuar me tetorin e vitit të kaluar numri i tyre ishte 55.4 për qind më i lartë. Statistikat e strukturave akomoduese të publikuara nga Instituti i Statistikave tregojnë se vizitorët gjithsej u rritën me 39.1 për qind, ku vizitorët jo-rezidentë shënuan rritje 55.4 për qind, ndërsa rezidentët u rritën me 5.8 për qind.
Net qëndrimet dhe zonat me rritjen më të madhe
Sipas publikimit të INSTAT, net qëndrimet gjithsej u rritën me 17.4 për qind, ku net qëndrimet nga vizitorët jo-rezidentë u rritën me 26.0 për qind, ndërsa ato nga rezidentët u ulën me 3.1 për qind. Rritja më e madhe e vizitorëve jo-rezidentë u shënua në zonat bregdetare me 73.6 për qind dhe në hotelet dhe akomodimet e ngjashme me 54.4 për qind.
Rezidenca e vizitorëve të huaj
Të dhënat për tetorin tregojnë një zhvillim të rëndësishëm sa i përket rezidencës së vizitorëve, ku Gjermania ka arritur të jetë në të njëjtin nivel me Italinë, duke u renditur të dytat me nga 13 për qind të vizitorëve secila, ndërsa vendin e parë vijon ta mbajë Kosova me 14 për qind. Sipas INSTAT, Franca kontribuoi me 7 për qind dhe Mbretëria e Bashkuar me 5 për qind të vizitorëve, ndërsa 48 për qind e tyre ishin nga vende të tjera.
Tregjet kryesore dhe shfrytëzimi i kapaciteteve
Këto të dhëna reflektojnë prirjen e rritjes së turizmit hyrës nga tregjet kryesore të rajonit dhe Evropës. Norma e shfrytëzimit të dhomave në hotele arriti në 31.6 për qind, krahasuar me 27.7 për qind në tetor 2024.
Tendenca e vjeshtës turistike
Shifrat e vjeshtës kanë rikthyer një tendencë pozitive në turizëm pas një vere më të zbehtë, ndërsa turoperatorët konfirmojnë se turet kulturore po kryesojnë rritjen e këtij viti. Deri në fund të tetorit, Shqipërinë e vizituan 11.1 milionë shtetas të huaj.
