Albania Smart City, kostoja e projektit të kamerave të sigurisë rritet në 134.4 mln euro
Kostoja e projektit “Albania Smart City” ka arritur në 134.4 milionë euro, pas disa rishikimesh radhazi, duke ngritur pikëpyetje mbi transparencën dhe barrën financiare për buxhetin e shtetit.
Rritje e vazhdueshme e kostos së projektit
Projekti “Albania Smart City”, i konsideruar si një nga investimet më të mëdha në fushën e sigurisë publike dhe teknologjisë, po shoqërohet me rritje të përsëritura të kostos financiare. Sipas dokumenteve zyrtare të konsultuara nga ekofin.al, me rishikimin e fundit, kostoja indikative ka arritur në 134.4 milionë euro.
Nga 60 milionë dollarë në mbi 130 milionë euro
Në fazën fillestare, projekti ishte parashikuar me një kosto rreth 60 milionë dollarë amerikanë. Pas vizitës së presidentit të Emirateve të Bashkuara Arabe në Tiranë, në shkurt të këtij viti, projekti u rikonceptua dhe u parashikua të financohej përmes një huaje nga Fondi i Zhvillimit i Abu Dhabit, duke rritur ndjeshëm vlerën e tij.
Huaja dhe ratifikimi në Kuvend
Detajet e financimit u bënë publike përmes një projektligji të depozituar në Kuvend, i miratuar në mars përpara zgjedhjeve, i cili parashikon ratifikimin e një marrëveshjeje huaje me vlerë 118.5 milionë dollarë amerikanë. Kjo hua është destinuar për projektin “Sistemi i kamerave nën administrimin e Policisë së Shtetit – Smart City”.
Pajisjet dhe komponentët e projektit
Sipas dokumentacionit shoqërues, projekti përfshin instalimin e 2 239 kamerave ANPR për njohjen automatike të targave, 2 602 kamera PTZ për monitorimin e trafikut, 3 816 kamera trupi për efektivët e Policisë së Shtetit, si dhe 100 radarë inteligjentë dhe 100 sensorë për monitorimin e flukseve të trafikut në rrugët e vendit.
Rishikimi i fundit dhe pikëpyetjet
Megjithatë, me përditësimin e fundit të listës së projekteve me rëndësi kombëtare, kostoja indikative është rritur sërish. Nga 112 milionë euro që ishte në korrik, ajo ka arritur në 134.4 milionë euro në rishikimin e muajit nëntor, që me kursin aktual përkthehet në rreth 157 milionë dollarë amerikanë.
Debati mbi transparencën dhe financimin
Kjo rritje e fundit përbën ndryshimin më domethënës financiar të projektit, i cili pritet të implementohet nga kompania arabe “Presight”. Rritjet e njëpasnjëshme të buxhetit, mungesa e sqarimeve publike dhe fakti që huaja merret nga një fond arab për t’u përdorur për pagesën e një kompanie arabe, pa një proces gare, kanë ngritur shqetësime mbi transparencën dhe ndikimin afatgjatë në financat publike.
