Moti i keq në vend: Përmbytje në Lezhë dhe Durrës, bllokohet aksi për në Tiranë

Reshjet intensive të shiut kanë përfshirë të gjithë vendin, duke shkaktuar përmbytje, bllokime rrugësh dhe pezullim të procesit mësimor në disa qarqe, me situatën më problematike në Durrës dhe Lezhë.

Situata në Durrës dhe bllokimi i aksit për Tiranë

Reshjet e dendura kanë shkaktuar përmbytje në disa zona të qytetit të Durrësit, përfshirë zonën rreth stadiumit, Spitallën dhe NISH Tulla. Prani e konsiderueshme uji është evidentuar edhe në oborret e banesave dhe në disa biznese në zonën e njohur si “Ish-Këneta”. Si pasojë e situatës, procesi mësimor është pezulluar në të gjithë qarkun, ndërsa oborri i Universitetit “Aleksandër Moisiu” është mbuluar nga uji.

Probleme serioze janë shfaqur edhe në rrugën interurbane Tiranë–Durrës, pranë karburantit në hyrje të qytetit, ku prania e madhe e ujit në të dy krahët e rrugës e ka bërë të pamundur qarkullimin normal të automjeteve. Policia Rrugore ka devijuar trafikun, duke orientuar mjetet që vijnë nga jugu drejt Tiranës përmes Rrugës së Plepave–Ndroq dhe aksit “Rrogozhinë–Elbasan–Tiranë”, ndërsa për në Durrës qarkullimi bëhet nga rruga e universitetit në drejtim të Spitallës dhe aksit “Tiranë–Elbasan–Rrogozhinë”.

Përmbytje dhe pezullim mësimi në Lezhë

Në Lezhë, sistemi i kanalizimeve nëntokësore nuk ka përballuar prurjet e shumta, duke sjellë përmbytje në lagjen “Besëlidhja”. Situata më e rënduar është regjistruar në blloqet e banimit “11 Janari” dhe “11.2 Hektarë”, ku uji ka arritur disa centimetra, duke bllokuar hyrjet e pallateve dhe vështirësuar lëvizjen e qytetarëve dhe automjeteve. Për shkak të pranisë së ujit në ambientet e jashtme, është pezulluar procesi mësimor në shkollat 9-vjeçare “Kosova” dhe “Gjergj Fishta”. Po ashtu, prurjet e shumta të Lumit Drin kanë përmbytur shtetëroren në lagjen “Skënderbeg”.

Prurjet në kaskadën e Drinit dhe situata në veri

Reshjet e vazhdueshme kanë rritur prurjet në kaskadën e Drinit, duke bërë që të vijojnë shkarkimet nga hidrocentralet e Komanit dhe Vaut të Dejës me rreth 700 metër kub ujë në sekondë. Sipas të dhënave nga Bashkia Shkodër dhe Shtabi i Emergjencave në Prefekturë, aktualisht nuk paraqitet rrezik për përmbytje.

Hidrocentrali i Fierzës ndodhet në kuotën 280 metra, nga 296 metra që është niveli maksimal i lejuar, duke operuar në parametra të kontrolluar. Në Lezhë, prurjet nga lumenjtë dhe përrenjtë janë shtuar ndjeshëm, por deri tani nuk janë konstatuar probleme të reja. Niveli i ujit në Bunë, Drin, Kir dhe Gjadër mbetet nën kuotat e rrezikut, ndërsa situata është e qëndrueshme edhe në rezervuarin e Shkodrës. Hidrovoret Vilun dhe Cas janë në funksion me nga pesë pompa dhe në gatishmëri për punë me kapacitet të plotë.

Probleme në Malësinë e Madhe dhe zona të tjera

Në Malësinë e Madhe vijojnë reshjet me intensitet mesatar, ndërsa fshati Flakë mbetet i bllokuar si pasojë e prurjeve të përroit. Furnizimi me energji elektrike paraqitet problematik në disa zona, kryesisht në Kelmend dhe Shkrel. Në Vaun e Dejës, lumi Gjadër ka dalë nga shtrati, duke rritur nivelin e ujit në lagjen “Kapedani”, ndërsa në Fushë-Arrëz janë shënuar shkarje dherash dhe rënie gurësh në disa rrugë automobilistike. Në qytetin e Shkodrës nuk raportohen probleme në qarkullimin rrugor, por zona të Postribës dhe Kelmendit vijojnë të jenë pa energji elektrike, ku ekipet janë në terren për riparime.

Burimi: Shqiptarja

Më të lexuarat