Moti i keq me stuhi e ngrica shkakton kaos, vonesa në fluturime dhe viktima në Evropë

Stuhia Goretti ka sjellë borë, akull dhe kaos në transportin ajror, hekurudhor dhe rrugor në disa vende europiane.

Evropa Perëndimore po përballet me reshje të dendura bore dhe ngrica të forta, teksa stuhia Goretti, e para e emërtuar për këtë vit, ka goditur bregdetin Atlantik dhe është shtrirë në disa shtete të kontinentit. Kushtet e motit kanë shkaktuar anulime masive fluturimesh, vonesa të mëdha në transportin hekurudhor dhe paralajmërime për rrezik të lartë në rrugë, ndërsa janë raportuar edhe viktima.

Kaos në aeroportet e Francës

Në Francë, rreth 100 fluturime u anuluan në aeroportin Charles de Gaulle në Paris gjatë orëve të para të së mërkurës, ndërsa edhe 40 fluturime të tjera u anuluan në aeroportin Orly, për shkak të reshjeve të borës dhe të ftohtit të ashpër. Ministri francez i Transporteve, Philippe Tabarot, bëri të ditur se ndërprerjet ishin parashikuar që të martën në mbrëmje dhe shprehu shpresën se situata do të normalizohej gjatë pasdites. Shërbimet publike të autobusëve në Paris dhe periferitë përreth u pezulluan për shkak të rrugëve të akullta, ndërsa pjesa më e madhe e metrosë dhe trenave periferikë vijuan të funksionojnë.

Kompania shtetërore hekurudhore SNCF paralajmëroi për vonesa dhe anulime, duke sqaruar se bora në shina i ka detyruar të kufizojnë shpejtësinë e trenave dhe të riorganizojnë qarkullimin. Sipas Météo France, 38 nga 96 departamentet e Francës kontinentale janë vendosur në alarm për reshje të dendura bore dhe ngrica të rrezikshme, me trashësi bore nga tre deri në shtatë centimetra, ndërsa vala e të ftohtit cilësohet si me intensitet të rrallë për këtë periudhë të vitit.

Pasagjerë të bllokuar në Amsterdam dhe Bruksel

Aeroporti Schiphol i Amsterdamit njoftoi anulimin e të paktën 700 fluturimeve për shkak të borës dhe erërave të forta. Shumica e fluturimeve brenda Evropës u pezulluan deri në fund të ditës, ndërsa disa fluturime ndërkombëtare u realizuan me vonesa. Më shumë se 1.000 persona kaluan natën në aeroport, ku u vendosën shtretër kampingu dhe u ofrua ushqim për udhëtarët e bllokuar.

Në Belgjikë, rreth 40 fluturime u anuluan në aeroportin e Brukselit, ndërsa autoritetet paralajmëruan për vonesa të pashmangshme për shkak të procesit të shkrirjes së akullit në avionë dhe pastrimit të pistave. Edhe aeroporti i Budapestit raportoi anulimin e 20 fluturimeve gjatë natës, pasi kryeqyteti hungarez përjetoi një nga reshjet më të mëdha të borës në 15 vitet e fundit.

Trenat Eurostar dhe rrugët nën presion

Eurostar njoftoi se shërbimet midis Londrës dhe Parisit, Amsterdamit dhe Brukselit po përballen me vonesa të mëdha dhe anulime të minutës së fundit për shkak të borës. Disa trena po funksionojnë me shërbime të kufizuara, duke mos lejuar ndalesa ndërmjetëse. Në Holandë, rrjeti hekurudhor dhe ai rrugor janë bllokuar nga bora, ndërsa operatori hekurudhor NS u bëri thirrje qytetarëve të shtyjnë udhëtimet nëse është e mundur.

Paralajmërime në Mbretërinë e Bashkuar

Në Mbretërinë e Bashkuar, paralajmërime për erëra të forta dhe reshje bore janë në fuqi në disa rajone, përfshirë Cornwall, Devon, Uells dhe jugperëndimin e Anglisë. Shërbimi meteorologjik britanik paralajmëroi për kushte shumë të vështira udhëtimi dhe vonesa, ndërsa Agjencia e Sigurisë Shëndetësore zgjati alarmet shëndetësore për të ftohtin deri në fundjavë.

Viktima dhe të lënduar nga moti ekstrem

Rënia e temperaturave dhe ngricat kanë sjellë edhe humbje jete. Në Francë, pesë persona kanë humbur jetën që nga fillimi i valës së të ftohtit, tre prej tyre në aksidente të lidhura me akullin e zi, ndërsa një shofer taksie ndërroi jetë pasi automjeti i tij doli nga rruga dhe ra në lumin Marne. Në Hungari, një grua humbi jetën në një aksident automobilistik të shkaktuar nga akulli. Në Bosnje dhe Hercegovinë, një grua vdiq në spital pasi u godit nga një pemë e rrëzuar nën peshën e borës, pas reshjeve të dendura që sollën deri në 40 centimetra borë në Sarajevë.

Burimi: Ekofin

Më të lexuarat