Kosovë, përfundon numërimi i të gjitha votave, Vetëvendosje shkon mbi 51 për qind

Komisioni Qendror i Zgjedhjeve ka mbyllur numërimin e plotë të votave për zgjedhjet e parakohshme parlamentare të 28 dhjetorit, të cilat u fituan nga Lëvizja Vetëvendosje me 51.11 për qind.

Rezultati historik i Vetëvendosjes

Pas procesimit të të gjitha votave, Lëvizja Vetëvendosje ka marrë 51.11 për qind të tyre, duke shënuar për herë të parë në historinë e Kosovës një rezultat mbi 50 për qind për një parti të vetme. Në total, Vetëvendosje ka siguruar 486 mijë e 994 vota, duke përforcuar pozicionin e saj si forcë dominuese politike në vend.

Me këtë rezultat, LVV-ja e Albin Kurtit ka siguruar 57 ulëse në Kuvend. Për formimin e Qeverisë i nevojitet bashkëpunimi me partitë e komuniteteve pakicë për të arritur shumicën minimale prej 61 deputetësh.

Rritje mandatesh dhe avantazh ndaj zgjedhjeve të mëparshme

Vetëvendosje ishte e vetmja parti që shënoi rritje mandatesh krahasuar me zgjedhjet e 9 shkurtit, të cilat nuk prodhuan një qeveri të re. Në atë proces zgjedhor, LVV-ja kishte fituar 48 ulëse, ndërsa tani ka shtuar ndjeshëm përfaqësimin në Kuvend.

Renditja e partive të tjera parlamentare

Partia Demokratike e Kosovës u rendit e dyta, duke siguruar 22 ulëse me 20.19 për qind të votave, dy më pak se në zgjedhjet e mëparshme. Lidhja Demokratike e Kosovës pësoi humbjen më të madhe, duke rënë nga 20 në 15 ulëse, me një rezultat prej 13.23 për qind.

Aleanca për Ardhmërinë e Kosovës fitoi 6 ulëse me 5.5 për qind të votave. Nga komuniteti serb, Lista Serbe siguroi 9 ulëse, ndërsa Za Zlobodu Pravdu i Opstanak mori një ulëse, duke plotësuar kuotën prej 10 mandateve të rezervuara.

Ulëset për komunitetet e tjera u shpërndanë mes partive përfaqësuese të komunitetit turk, boshnjak, rom, egjiptian dhe goran, me gjithsej 10 mandate.

Kandidatët më të votuar në zgjedhje

Në mesin e dhjetë kandidatëve më të votuar, nëntë i përkasin Lëvizjes Vetëvendosje. Albin Kurti u bë personi më i votuar në historinë e Kosovës, me mbi 404 mijë vota. I dyti u rendit Glauk Konjufca me mbi 318 mijë vota, ndërsa pas tij Albulena Haxhiu me më shumë se 174 mijë vota dhe Hekuran Murati me mbi 171 mijë vota.

I vetmi kandidat jashtë Vetëvendosjes në dhjetëshen më të votuar ishte Bedri Hamza, kryetari i PDK-së, i cili mori mbi 161 mijë vota.

Ankesat dhe hapat drejt certifikimit

Zëdhënësi i KQZ-së, Valmir Elezi, bëri të ditur se institucioni është i gatshëm për shpalljen e rezultateve përfundimtare, por sipas ligjit, subjektet politike kanë të drejtë të paraqesin ankesa në Panelin Zgjedhor për Ankesa dhe Parashtresa brenda 48 orëve.

Numërimi i fundit përfshiu votat me postë, proces që përfundoi në orët e para të 9 janarit. Pikërisht për këto vota, Partia Demokratike e Kosovës ka depozituar një ankesë në PZAP, duke kërkuar shfuqizimin e mijëra fletëvotimeve të diasporës.

Pjesëmarrja dhe pritshmëritë për qeverinë e re

Në zgjedhjet e 28 dhjetorit morën pjesë rreth 45 për qind e trupit votues. Lëvizja Vetëvendosje ka deklaruar se synon formimin sa më të shpejtë të institucioneve të reja pas certifikimit të rezultateve.

Zgjedhjet e parakohshme u mbajtën pas dështimit të partive politike për të konstituuar Kuvendin pas zgjedhjeve të 9 shkurtit dhe pamundësisë për të formuar qeveri nga asnjëra palë.

Burimi: Monitor

Më të lexuarat