Presidenti dekreton Paqen Fiskale, kur nis zbatimi i ligjeve të reja

13-01-2026

Ligjet e paketës fiskale janë dekretuar dhe zbatimi i tyre nis pas botimit në Fletoren Zyrtare dhe akteve nënligjore.

Presidenti i Republikës ka dekretuar ligjet e paketës fiskale, duke përfshirë ligjin “Për marrëveshjen e Paqes Fiskale”, ligjin “Për fshirjen, shuarjen dhe pagesën e detyrimeve tatimore ndaj administratës tatimore qendrore e vendore dhe e detyrimeve të pagueshme në doganë”, si edhe ndryshimet në ligjin e TVSH-së që parashikojnë rimbursimin 10 për qind të TVSH-së për fermerët. Dekretimi dhe botimi i ligjeve në Fletoren Zyrtare i hap rrugë zbatimit të tyre nga administrata tatimore, ndërsa zbatimi i plotë nis pas miratimit të akteve nënligjore përkatëse.

Nga shtatë ligjet e paketës fiskale, deri më tani në Fletoren Zyrtare është botuar vetëm ligji për “Rivlerësimin e Pasurive të Paluajtshme”. Ndër ligjet që kanë nxitur pritshmëri të larta nga bizneset, pavarësisht rezervave të shprehura nga institucionet ndërkombëtare, janë ligji për Marrëveshjen e Paqes Fiskale dhe ligji për fshirjen e detyrimeve të papaguara në tatime dhe dogana.

Aktualisht, shumë biznese kanë shprehur interes për të nënshkruar Marrëveshjen e Paqes Fiskale me administratën tatimore, por kërkesat e tyre po refuzohen nga inspektorët për shkak të mungesës së akteve nënligjore. Administrata Tatimore ka sqaruar për Monitor se zbatimi i këtyre ligjeve do të nisë pas dekretimit, botimit në Fletoren Zyrtare dhe miratimit të udhëzimeve përkatëse që përcaktojnë procedurat konkrete.

Edhe Ministria e Financave ka bërë të ditur se ligjet hyjnë në fuqi pas dekretimit dhe botimit në Fletoren Zyrtare. Udhëzimi për zbatimin e ligjit për fshirjen e detyrimeve tatimore dhe doganore duhet të miratohet brenda 15 ditëve nga hyrja në fuqi e ligjit, ndërsa udhëzimi për Marrëveshjen e Paqes Fiskale duhet të miratohet brenda tre muajve.

Afatet dhe efektet e Marrëveshjes së Paqes Fiskale

Ligji “Për Marrëveshjen e Paqes Fiskale” parashikon që ai të hyjë në fuqi 15 ditë pas botimit në Fletoren Zyrtare dhe t’i shtrijë efektet deri në vitin tatimor 2028. Marrëveshja zbatohet fillimisht për një vit tatimor, me të drejtë rinovimi për dy vite të tjera. Procedurat për hartimin e propozimit, komunikimin me tatimpaguesin, konfirmimin elektronik, regjistrimin dhe ruajtjen e marrëveshjes, si edhe trajtimin e rasteve të refuzimit apo pavlefshmërisë, do të përcaktohen me udhëzim të ministrit përgjegjës për financat.

Sipas ligjit, Marrëveshja e Paqes Fiskale përfundon në rastet kur tatimpaguesi ndryshon llojin e veprimtarisë së deklaruar, nuk realizon rritje mbi 18 për qind të fitimit të tatueshëm, pezullon ose ndërpret aktivitetin ekonomik, kryen shkelje të përsëritura të detyrimeve tatimore, nuk paguan detyrimet sipas marrëveshjes, nuk përmbush kushtet e ligjit ose realizon rritje të fitimit të tatueshëm mbi 50 për qind gjatë vitit tatimor përkatës, krahasuar me vitin paraardhës.

Procedura e aplikimit

Marrëveshja e Paqes Fiskale realizohet përmes aplikimit elektronik në platformën “e-filing” nga tatimpaguesi, brenda afatit për dorëzimin e deklaratës vjetore të të ardhurave të vitit paraardhës. Për vitin e parë të zbatimit, afati do të përcaktohet me udhëzim të Drejtorit të Përgjithshëm të Tatimeve. Propozimi i marrëveshjes hartohet nga administrata tatimore dhe i komunikohet tatimpaguesit përmes platformës elektronike, duke përcaktuar fitimin e tatueshëm dhe normat e detyrimit tatimor.

Tatimpaguesi ka të drejtë ta pranojë ose ta refuzojë propozimin deri më 15 prill. Me pranimin dhe nënshkrimin elektronik, marrëveshja konsiderohet e lidhur dhe ka efekt ligjor për vitin tatimor përkatës. Mosrespektimi i saj trajtohet si shkelje tatimore.

Ligji për fshirjen e detyrimeve dhe ndryshimet në TVSH

Ligji “Për fshirjen, shuarjen dhe pagesën e detyrimeve tatimore ndaj administratës tatimore qendrore e vendore dhe të detyrimeve të pagueshme në doganë” hyn në fuqi 15 ditë pas botimit në Fletoren Zyrtare dhe i shtrin efektet nga 1 janar 2026 deri më 31 dhjetor 2026. Brenda 15 ditëve nga hyrja në fuqi, ministri përgjegjës për financat duhet të miratojë udhëzimin për zbatimin e tij.

Ndërkohë, ligji për ndryshimet në TVSH parashikon kompensimin 10 për qind të TVSH-së për fermerët për shitjet e mallrave bujqësore ndaj grumbulluesve, përpunuesve apo agrobizneseve të certifikuara, përmes autofaturave të lëshuara nga blerësit.

Burimi: Monitor