Çmimet e produkteve jo ushqimore u rritën me 3 për qind në 2025, më e larta në dy vjet
Inflacioni bazë u përshpejtua në fund të 2025, duke reflektuar presione më të forta nga ekonomia e brendshme.
Inflacioni bazë mbyll vitin në rritje
Inflacioni bazë e mbylli vitin 2025 në rritje. Sipas informacionit të Bankës së Shqipërisë, në dhjetor inflacioni bazë arriti nivelin 3.03%, nga 2.5% që kishte qenë një vit më parë. Ai shënoi gjithashtu një rritje të lehtë krahasuar me nivelin 2.98% të muajit nëntor, duke u rikthyer në rritje për herë të parë që prej vitit 2022.
Çfarë mat inflacioni bazë
Nënshporta që mat inflacionin bazë llogaritet mbi një grup produktesh dhe shërbimesh që përbëjnë 69.6% të totalit të shportës së Indeksit të Çmimeve të Konsumit. Ky tregues përjashton produktet me luhatshmëri të lartë, si ushqimet dhe energjia, me synimin për të zhveshur rritjen e përgjithshme të çmimeve nga lëvizjet afatshkurtra dhe për të pasqyruar tendencat më afatgjata të inflacionit, ndaj edhe monitorohet vazhdimisht nga Banka e Shqipërisë.
Inflacioni bazë neto dhe treguesit e tjerë
Paralelisht, inflacioni bazë neto gjatë vitit 2025 u rrit në 3.47%, nga 2.21% që kishte qenë një vit më parë. Ky tregues përjashton më tej edhe nëngrupet e ushqimeve të përpunuara, përfshirë bukën dhe drithërat, dhe matet mbi 44.6% të shportës së IÇK-së. Ndërkohë, inflacioni që përjashton të gjitha produktet ushqimore dhe energjetike në fund të vitit 2025 ishte 3.32%, nga 2.2% një vit më parë.
Inflacioni zyrtar dhe roli i importeve
Inflacioni zyrtar në Shqipëri, i matur për të gjithë shportën e mallrave të konsumit, e mbylli vitin 2025 në nivelin 2.3%, nga 2.1% që kishte qenë një vit më parë. Rritja më e kufizuar e këtij treguesi lidhet kryesisht me nivelin e ulët të inflacionit të importuar, ndërsa presionet inflacioniste më afatgjata të gjeneruara nga ekonomia e brendshme rezultojnë dukshëm më të larta.
Qiraja si burim kryesor presioni
Në një prononcim për Monitor, Banka e Shqipërisë vlerësoi se faktori kryesor i rritjes së inflacionit bazë dhe atij të brendshëm ka qenë përshpejtimi i çmimit të qirasë. Rritja e disa çmimeve të shërbimeve të lidhura me turizmin është balancuar pjesërisht nga rënia e çmimeve të disa mallrave të tjerë të përfshirë në këta tregues. Sipas Bankës së Shqipërisë, rritja e qirasë përbën aktualisht burimin kryesor të presioneve të brendshme inflacioniste, por në mungesë të rritjeve të përsëritura, efekti i saj pritet të jetë i përkohshëm.
Parashikimet për vitin 2026
Këshilli Mbikëqyrës i Bankës së Shqipërisë, në mbledhjen e fundit të vitit 2025, vërejti se balanca e përgjithshme e presioneve afatmesme po afrohet gradualisht drejt objektivit të inflacionit të bankës qendrore. Inflacioni parashikohet të kthehet në objektivin prej 3% gjatë tremujorit të dytë të vitit 2026.
