BERZH dhe BSH: Emigracioni dhe plakja mbeten sfida kryesore për ekonominë
Plakja e popullsisë dhe largimi i të rinjve po rrisin presionin mbi tregun e punës, pensionet dhe rritjen afatgjatë.
Ekonomia shqiptare po përballet me sfida të rëndësishme strukturore, të lidhura me plakjen e shpejtë të popullsisë dhe emigrimin e vazhdueshëm të të rinjve. Banka Evropiane për Rindërtim dhe Zhvillim dhe Banka e Shqipërisë nënvizojnë se këto fenomene përbëjnë rreziqe serioze për zhvillimin ekonomik dhe kërkojnë projekte të qëndrueshme dhe politika afatgjata për t’u frenuar.
Guvernatori i Bankës së Shqipërisë, Gent Sejko, theksoi se emigracioni, plakja e popullsisë dhe mungesa e fuqisë punëtore përbëjnë një pikë kthese demografike që kërkon vëmendje të shtuar. Sipas tij, ndërsa gjithnjë e më pak persona hyjnë në tregun e punës, një numër në rritje qytetarësh mbështeten në sistemet e pensioneve dhe të kujdesit shëndetësor, duke ushtruar presion mbi produktivitetin, financat publike, politikat e prioritizimit dhe perspektivat afatgjata të rritjes ekonomike në rajone të ndryshme të vendit.
Investimet si përgjigje ndaj sfidave demografike
Drejtoresha e BERZH për Shqipërinë, Ekaterina Solovova, theksoi se investimet dhe projektet që krijojnë vende pune janë një nga instrumentet kryesore për ndërtimin e një ekonomie më të qëndrueshme. Ajo bëri të ditur se gjatë vitit 2025, BERZH është angazhuar në 31 projekte me vlerë totale 217 milionë euro, ku 111 milionë euro janë investuar në infrastrukturë të qëndrueshme në transport dhe energji. Sipas saj, BERZH ka mbështetur gjithashtu sektorë si turizmi, agroturizmi, si dhe nisma për të rinjtë dhe përfshirjen e grave në biznes.
Nevoja për reforma të thelluara
Gjatë prezantimit të Raportit të Tranzicionit 2025–2026, u theksua nevoja për veprime të koordinuara dhe vullnet politik për reformimin e sistemit të pensioneve, modernizimin e tregut të punës dhe hartimin e politikave të qarta për migracionin. Sipas vlerësimeve, vetëm përmes reformave të qëndrueshme dhe investimeve strategjike mund të përballohen efektet e plakjes së popullsisë dhe emigracionit mbi ekonominë shqiptare.
