Kuvendi miratoi ndryshimet në ligjin për tregtarët dhe shoqëritë tregtare, duke i hapur rrugë thjeshtimit të mëtejshëm të procedurave të regjistrimit e çregjistrimit të bizneseve.
Ndryshimet ligjore përcaktojnë gjithashtu rregulla të reja që duhen përmbushur nga bizneset në mënyrë që të vijojnë aktivitetin e tyre normal. Nisma ligjore e trashëguar nga sesioni i kaluar parlamentar mundëson një kuadër ligjor bashkëkohor, të qartë dhe të përditësuar, në përputhje të plotë me direktivat e BE-së për shoqëritë tregtare. Në fund të seancës që zgjati rreth një orë, Kuvendi miratoi me votat e mazhorancës edhe vendimin për fillimin e procedurave parlamentare për auditimin e veprimtarisë ekonomike të Kontrollit të Lartë të Shtetit.
“Preken” aksionet dhe pergjegjësitë
Ligji i ri “për tregtarët dhe shoqëritë tregtare”, i miratuar nga Kuvendi synon të ofrojë një kuadër ligjor në përputhje të plotë me direktivat e Bashkimit Europian për shoqëritë tregtare. Në dokumentin e Partneritetit Europian është vendosur, si prioritet afatshkurtër për Shqipërinë, modifikimi i legjislacionit ekzistues për të drejtën e vendosjes, me qëllim trajtimin e barabartë mes shoqërive të huaja dhe atyre vendase, çka reflektohet edhe në ndryshimet e miratuara. Ligji parashikon gjithashtu rishikimin e atyre dispozitave që lehtësojnë procedurat pranë QKR-së dhe që sigurojnë një mbrojtje më të mirë për konsumatorin e përmirësojnë klimën e biznesit në vend.Ky ligj pritet të ketë impakt direkt tek shoqëritë tregtare, të cilat duhet të përmbushin standartet ligjore në mënyrë që të mund të vijojnë aktivitetin e tyre normalisht apo që të mos ndëshkohen financiarisht. Një prej ndryshimeve kryesore është ai që që lidhet me mënyrën e ndarjes së aksioneve në një shoqëri tregatare, të cilat sipas ligjit të ri, duhet të ndahen në kuota të barabarta me numrin e ortakëve, ku secila kuotë përfaqëson në vlerë kontributin e secilit. Po ashtu, në ligji përcakton ndarjen e përgjegjësisë mes bordit të aksionerëve me administratorit, ku ky i fundit mban përgjegjësi për rentabilitetin e shoqërisë.Kjo ndarje kufizon rrezikun e përgjegjësive që ortakët apo aksionarët e një shoqërie me përgjegjësi të kufizuar apo shoqërie anonime mund të kenë nga një investim jo rentabël, duke parashikuar se përgjegjësia e tyre personale, për detyrimet e shoqërisë tregtare, shtrihet deri në pjesën e pashlyer të kontributeve të nënshkruara. Një risi tjetër është ajo që i jep zgjidhje problematikës së çregjistrimit të bizneseve që falimentojnë por që nuk kanë mundësi të likujdojnë detyrimet.Kushti i mëparshëm ishte që për çregjistrim, kompania duhej të shlyente filimisht detyrimet ndërsa me ndryshimet e reja, ky detyrim bie nëse faktohet pafuqia likujduese e biznesit të falimentuar. Ligji i ri përmban 40 ndryshime ligjore, të cilat pas botimit në Fl toren Zyrtare do të nisin të zbatohen konkretisht.
