Energjia elektrike 2025, prodhimi nga dielli u rrit me 94.5 për qind, bien humbjet në rrjet
Fotovoltaikët rriten me 94.5 për qind, ndërsa importet e energjisë shtohen për shkak të rënies së prodhimit hidro.
Viti 2025 shënoi zhvillime të përziera për sektorin energjetik në Shqipëri, ku rritja e konsumit dhe ulja e prodhimit hidro sollën një varësi më të madhe nga importet. Sipas të dhënave të Institutit të Statistikave, energjia elektrike në dispozicion arriti në 8.345 GWh, nga 8.171 GWh në vitin 2024, duke shënuar një rritje prej 2.1 për qind.
Bie prodhimi vendas, rriten importet
Prodhimi neto vendas i energjisë elektrike ra në 7.468 GWh, nga 7.837 GWh një vit më parë, ose 4.7 për qind më pak. Rënia lidhet kryesisht me tkurrjen e prodhimit nga hidrocentralet publike, të cilat prodhuan 3.374 GWh, nga 4.085 GWh në vitin 2024, duke shënuar një ulje prej 17.4 për qind.
Në këto kushte, importet e energjisë elektrike u rritën ndjeshëm në 3.375 GWh, nga 2.669 GWh në vitin 2024, një rritje prej 26.5 për qind. Eksportet gjithashtu u rritën, por më pak, duke arritur në 2.498 GWh nga 2.335 GWh një vit më parë, ose 7 për qind më shumë.
Si rezultat, bilanci neto i shkëmbimeve rezultoi negativ në −877 GWh për vitin 2025, nga −334 GWh në vitin 2024, duke reflektuar një varësi më të madhe nga tregjet e jashtme.
Energjia diellore rritet me ritme të shpejta
Një nga zhvillimet më pozitive të vitit ishte rritja e prodhimit nga burime të tjera të rinovueshme, kryesisht energjia fotovoltaike. Prodhimi nga këta operatorë arriti në 984 GWh në vitin 2025, nga 507 GWh në vitin 2024, duke shënuar një rritje prej 94.5 për qind.
Prodhuesit privatë dhe koncesionarë realizuan 3.109 GWh energji, me një rënie të lehtë prej 4.2 për qind krahasuar me një vit më parë. Në total, struktura e prodhimit neto vendas për vitin 2025 përbëhej nga 45.2 për qind hidrocentrale publike, 41.6 për qind prodhues privatë dhe koncesionarë dhe 13.2 për qind burime të tjera të rinovueshme.
Rritet konsumi familjar dhe ulen humbjet
Konsumi total i energjisë elektrike arriti në 6.752 GWh në vitin 2025, nga 6.556 GWh në vitin 2024, duke u rritur me 3 për qind. Rritja u udhëhoq nga konsumatorët familjarë, të cilët përdorën 3.641 GWh energji, ose 6.8 për qind më shumë se një vit më parë. Konsumi nga klientët jo familjarë ra lehtë në 3.111 GWh, me një ulje prej 1.2 për qind.
Në të njëjtën kohë, humbjet në rrjet u ulën në 1.593 GWh nga 1.614 GWh një vit më parë, ose 1.3 për qind më pak. Pesha e humbjeve në totalin e energjisë në dispozicion ra në 19.1 për qind, nga 19.8 për qind në vitin 2024.
Të dhënat tregojnë se sistemi energjetik shqiptar mbetet i ndjeshëm ndaj luhatjeve të prodhimit hidro, ndërsa rritja e energjisë diellore dhe burimeve të tjera të rinovueshme po fiton gradualisht peshë në strukturën e prodhimit.
