Kriza e industrisë, bie me 35 për qind numri i lejeve të ndërtimit në vitin 2025
Investimet në ndërtesa industriale në Shqipëri ranë ndjeshëm në vitin 2025, duke reflektuar vështirësitë që po kalon sektori i prodhimit.
Sipas të dhënave të INSTAT, gjatë vitit 2025 u dhanë vetëm 91 leje ndërtimi për objekte industriale në të gjithë vendin, nga 132 një vit më parë. Kjo përfaqëson një rënie prej rreth 31 për qind të numrit të lejeve.
Rënie ka pësuar edhe sipërfaqja e ndërtesave industriale të miratuara për ndërtim, e cila u tkurr me rreth 24 për qind krahasuar me vitin 2024.
Më pak investime në kapacitete prodhuese
Rënia e ndërtimeve industriale konsiderohet një tregues i dobësimit të investimeve në sektorin prodhues. Më pak fabrika, magazina apo impiante industriale do të thotë më pak kapacitete prodhuese në të ardhmen dhe më pak vende pune.
Industria është një nga sektorët kryesorë që gjeneron eksporte dhe punësim të qëndrueshëm. Për këtë arsye, tkurrja e investimeve në këtë sektor pritet të ndikojë në uljen e prodhimit dhe të eksporteve në vitet e ardhshme.
Mungesa e projekteve të reja industriale kufizon gjithashtu modernizimin e teknologjisë dhe aftësinë e ndërmarrjeve për të përballuar konkurrencën ndërkombëtare.
Rritja e kostove dhe rënia e kërkesës
Sektori industrial po përballet me një kombinim faktorësh që kanë rritur presionin mbi bizneset. Një prej tyre është rritja e pagës minimale, e cila nga 40 mijë lekë në vitin 2025 është rritur në 50 mijë lekë në vitin 2026.
Sipas raportimeve të industrisë, disa fabrika të vogla dhe të mesme janë mbyllur në fillim të vitit për shkak të rritjes së kostove të punës.
Kjo situatë është reflektuar edhe në rënien e eksporteve të sektorit të tekstileve dhe këpucëve. Në janar 2026, eksportet e këtij sektori arritën në rreth 8 miliardë lekë, me një rënie prej 5.8 për qind krahasuar me të njëjtën periudhë të vitit të kaluar.
Konkurrenca ndërkombëtare mbetet e fortë
Përveç kostove të brendshme, industria shqiptare po përballet edhe me dobësimin e kërkesës nga tregjet e jashtme dhe me rritjen e kostove logjistike.
Në të njëjtën kohë, konkurrenca nga vendet e rajonit dhe nga ekonomitë aziatike mbetet e fortë, pasi këto vende ofrojnë kosto më të ulëta të punës dhe janë më tërheqëse për porositësit ndërkombëtarë.
k.jpg)