Në prag të sezonit turistik, Saranda hap tender për rikualifikimin e rrugëve të amortizuara
Bashkia Sarandë ka shpallur tenderin për rikualifikimin e disa rrugëve dhe shesheve në zona urbane dhe turistike në prag të sezonit veror.
Ndërhyrje në disa zona të qytetit
Bashkia Sarandë ka shpallur hapjen e garës për projektin që parashikon rikualifikimin e rrugëve dhe shesheve në zonat Gjashtë, Metoq, Bërdenesh, Çukë dhe Manastir. Sipas dokumentit të publikuar në Agjencinë e Prokurimit Publik, ndërhyrjet do të fokusohen në përmirësimin e infrastrukturës rrugore në segmente që ndodhen në zona urbane dhe turistike të qytetit.
Investimi synon të përmirësojë kushtet e lëvizjes për banorët e këtyre zonave, por edhe për turistët vendas dhe të huaj që frekuentojnë Sarandën gjatë sezonit veror.
Tre rrugë do të rikualifikohen
Dokumenti i tenderit parashikon ndërtimin dhe rikualifikimin e tre rrugëve që aktualisht paraqiten të amortizuara dhe të degraduara në pjesën më të madhe të tyre. Projekti përfshin projektimin dhe ndërtimin e rrugëve të brendshme me beton dhe asfalt në zonat Metoq, Bërdenesh, Manastir dhe Gjashtë, duke përfshirë edhe nivelimin e terrenit dhe sistemimin e shtresave rrugore. Qëllimi është përmirësimi i mjedisit urban dhe krijimi i hapësirave më funksionale për komunitetin dhe vizitorët.
Fondi i investimit
Sipas dokumentit të publikuar nga Agjencia e Prokurimit Publik, fondi limit i këtij projekti është 16 milionë e 591 mijë lekë. Investimi synon të rrisë sigurinë e lëvizjes si për këmbësorët ashtu edhe për automjetet, si dhe të shmangë problematikat infrastrukturore në të ardhmen.
Ndërhyrjet pritet të realizohen sipas standardeve bashkëkohore dhe europiane, duke e kthyer këtë rrjet rrugor në një element të rëndësishëm për zhvillimin urban dhe turistik të zonës.
k.jpg)