40 mln euro hua për rehabilitimin e HEC-it të Fierzës, miratohet marrëveshja

Kuvendi i Shqipërisë miratoi marrëveshjen e huas prej 40 milionë eurosh me bankën gjermane KfW për rehabilitimin e hidrocentralit të Fierzës.

Projektligji për ratifikimin e marrëveshjes u miratua vetëm me votat e mazhorancës dhe synon financimin e ndërhyrjeve për modernizimin elektromekanik të hidrocentralit më të madh në vend.

Modernizim i pajisjeve dhe rritje e eficiencës

Financimi prej 40 milionë eurosh do të përdoret për rehabilitimin elektromekanik të HEC-it të Fierzës, me qëllim rritjen e sigurisë dhe eficiencës së prodhimit të energjisë nga burimet e rinovueshme.

Ndërhyrjet parashikojnë përmirësimin e teknologjisë së pajisjeve, rritjen e besueshmërisë së funksionimit të hidrocentralit dhe zgjatjen e jetës së tij të shfrytëzimit me të paktën 30 vjet.

Mbështetje shtesë për projektin

Huaja e re i shtohet financimeve të mëparshme për rehabilitimin e këtij hidrocentrali dhe synon realizimin e ndërhyrjeve shtesë që janë identifikuar gjatë vlerësimeve teknike të kryera nga ekspertë ndërkombëtarë.

Projekti do të zbatohet nga Korporata Elektroenergjetike Shqiptare (KESH), ndërsa përfundimi i punimeve parashikohet në korrik të vitit 2030.

Burimi: Ekofin.al

Më të lexuarat