Energjia, nga Moglica tek linja me Kosovën, tre projektet që Shqipëria çon tek BE për financim
Shqipëria është përfshirë në disa projekte strategjike energjetike që synojnë financim nga BE, me fokus ruajtjen, transmetimin dhe integrimin e energjisë së rinovueshme.
Komuniteti i Energjisë ka hapur konsultimin për projektet me interes për vitin 2026, ku Shqipëria përfshihet në të paktën tre iniciativa kryesore që lidhen me modernizimin e sistemit energjetik dhe rritjen e bashkëpunimit rajonal.
Zgjerimi i Moglicës si “bateri” energjetike
Projekti më i madh është zgjerimi i hidrocentralit të Moglicës, i cili parashikon një kapacitet deri në 1,620 MW dhe rreth 30 GWh kapacitet ruajtjeje.
Ky investim do të funksionojë si një sistem magazinimi energjie, duke ruajtur energjinë në periudhat me tepricë dhe duke e rikthyer atë në rrjet kur kërkesa rritet.
Linja e re Shqipëri–Kosovë
Një tjetër projekt kyç është ndërtimi i një interkoneksioni të ri 400 kV me Kosovën, që përfshin zgjerimin e nënstacioneve dhe një linjë të re mes Fierzës dhe Prizrenit.
Ky investim synon të lehtësojë ngarkesën në rrjetin ekzistues dhe të mbështesë integrimin e energjisë së erës, si dhe të rrisë shkëmbimet energjetike në rajon.
Rehabilitimi i linjave rajonale
Projekti i tretë lidhet me rehabilitimin e linjës 220 kV që përfshin Shqipërinë, Malin e Zi dhe Bosnjën, duke rritur kapacitetin dhe duke ulur humbjet në transmetim.
Kjo ndërhyrje pritet të përmirësojë sigurinë e furnizimit dhe të lehtësojë integrimin e burimeve të rinovueshme në rajon.
Hap drejt integrimit energjetik europian
Projektet janë pjesë e listës PECI dhe synojnë të rrisin fleksibilitetin e sistemit energjetik në Ballkanin Perëndimor, duke përfituar financime nga BE dhe institucione ndërkombëtare.
Për Shqipërinë, këto investime shënojnë një kalim drejt një sistemi më të avancuar që kombinon prodhimin, ruajtjen dhe transmetimin ndërkufitar të energjisë.
k.jpg)