Forcimi i Lekut, rreziku i kursit të këmbimit për borxhin publik ra për të katërtin vit radhazi
Forcimi i Lekut dhe menaxhimi i borxhit kanë ulur ekspozimin ndaj valutës, ndërsa strategjia synon zgjatjen e maturiteteve dhe kontrollin e rreziqeve.
Rënie e rrezikut nga kursi i këmbimit
Rreziku i kursit të këmbimit për borxhin publik ka vijuar të bjerë gjatë vitit 2025. Sipas të dhënave të Ministrisë së Financave, pesha e borxhit në monedhë të huaj ndaj totalit zbriti në 40 për qind, nga 41.9 për qind që ishte një vit më parë.
Kjo rënie është ndikuar kryesisht nga forcimi i Lekut, i cili ka ulur vlerën e borxhit të shprehur në valutë dhe peshën e tij në total. Megjithatë, qeveria ka vijuar të marrë hua në valutë, veçanërisht përmes emetimit të Eurobondeve në tregjet ndërkombëtare.
Ekspozimi mbetet i ndjeshëm ndaj zhvlerësimit
Pavarësisht përmirësimit, një zhvlerësim i mundshëm i Lekut ndaj Euros do të rriste automatikisht peshën e borxhit në valutë, duke e bërë këtë tregues ende të ndjeshëm ndaj luhatjeve në kursin e këmbimit.
Rritje e lehtë e rrezikut të rifinancimit
Në të njëjtën kohë, rreziku i rifinancimit ka shënuar një rritje të lehtë. Pesha e borxhit të brendshëm që maturohet brenda një viti arriti në 39.2 për qind, nga 39 për qind një vit më parë, megjithatë ky nivel mbetet pranë minimumit historik.
Gjatë dekadës së fundit, Ministria e Financave ka ndjekur një strategji për zgjatjen graduale të maturitetit të borxhit, me synim uljen e presionit për rifinancim dhe përfitimin nga normat e favorshme të interesit.
Zgjatje e maturitetit të borxhit
Në fund të vitit 2025, maturiteti mesatar i borxhit të brendshëm u rrit në 2.8 vite, nga 2.6 vite që ishte një vit më parë. Ky zhvillim tregon përdorimin më të madh të instrumenteve afatmesme dhe afatgjata në strukturën e borxhit.
Sipas strategjisë afatmesme 2025-2029, objektivi mbetet rritja e mëtejshme e peshës së titujve afatgjatë dhe ulja e borxhit afatshkurtër, për të balancuar më mirë profilin e maturimit.
Ulet lehtë edhe rreziku i normave të interesit
Edhe rreziku nga normat e interesit ka shënuar një përmirësim të lehtë. Përqindja e borxhit që rifiksohet brenda një viti zbriti në 39.2 për qind, nga 39.3 për qind një vit më parë, duke reflektuar stabilizim gradual të këtij treguesi.
k.jpg)