Rikthehet lotaria amerikane, kriteret e reja të aplikimit për shqiptarët
Programi i Lotarisë Amerikane rikthehet në vjeshtë me kritere të reja aplikimi për qytetarët shqiptarë.
Lotaria amerikane (Diversity Visa) do të rikthehet në vjeshtën e këtij viti, duke u dhënë mundësi qytetarëve shqiptarë të aplikojnë sërish pas pezullimit të përkohshëm në janar. Pritet që numri i aplikimeve të arrijë në rreth 10 milionë, ndërsa Departamenti Amerikan i Shtetit ka publikuar disa ndryshime të rëndësishme në procedurat e aplikimit.
Sipas rregullave të reja, aplikantët duhet të ngarkojnë një pasaportë të vlefshme dhe një skanim të faqes biografike së bashku me nënshkrimin në formularin elektronik. Kjo masë synon të reduktojë rastet e falsifikimit dhe të përmirësojë verifikimin e identitetit dhe sigurisë së aplikantëve, ndërsa zyrtarët konsullorë do të kenë mundësi të kontrollojnë pranueshmërinë bazuar në vendin e lindjes dhe lidhjet me shtete me “pranueshmëri të ulët”.
Ndryshimet në formular dhe terminologji
Departamenti i Shtetit ka sqaruar gjithashtu disa ndryshime në terminologji dhe udhëzime, duke zëvendësuar termin “gjini” me “seks” dhe “mosha” me “data e lindjes”, ndërsa përdorimi i fjalës “duhet” synon të qartësojë detyrimet për zyrtarët dhe aplikantët gjatë procesit.
Kriteret kryesore për aplikim
Një nga ndryshimet kryesore është vendosja e një tarife simbolike prej 1 dollar në momentin e dorëzimit të aplikimit, pa përjashtime. Aplikantët duhet të kenë përfunduar shkollën e mesme ose një ekuivalente dhe të deklarojnë nivelin e tyre arsimor në formular.
Për aplikantët e martuar, është e detyrueshme të përfshihen të dhënat e bashkëshortit dhe të fëmijëve, duke përfshirë emrin, foton, datën dhe vendin e lindjes për fëmijët biologjikë, të adoptuar ligjërisht dhe ata nga martesa e bashkëshortit që janë nën 21 vjeç dhe të pamartuar në momentin e aplikimit. Përfshirja e bashkëshortit mbetet e detyrueshme edhe në rastet kur ai nuk jeton me aplikantin ose nuk planifikon të emigrojë, përveç rasteve kur ekziston ndarje ligjore.
Autoritetet theksojnë gjithashtu se janë forcuar kontrollet ndaj martesave të rreme, duke kërkuar prova të dokumentuara si certifikata martese dhe dokumente të tjera mbështetëse, si dhe mundësi për verifikime shtesë gjatë procesit.
Pezullimi dhe kategoritë e prekura
Pezullimi i programit në janar ndikoi në përpunimin e aplikimeve për 75 vende në botë dhe preku disa kategori vizash, përfshirë bashkimin familjar, punësimin, birësimin, emigrantët specialë dhe emigrimin përmes diversitetit. Megjithatë, ky vendim nuk përfshiu vizat studentore, turistike apo të biznesit, si dhe aplikimet për evente të veçanta si Kupa e Botës, edhe pse autoritetet amerikane kanë paralajmëruar kontrolle të rrepta për të gjithë aplikantët.
k.jpg)