Binaj: Pas turizmit e ndërtimit, nga 1 prilli sektori mjekësor në fokus, publikojmë pagat referencë
DPT paralajmëron masa kundër informalitetit dhe zgjerim të shërbimeve dixhitale për tatimpaguesit.
Shërbimet dixhitale dhe lehtësitë për tatimpaguesit
Drejtori i Përgjithshëm i Drejtorisë së Përgjithshme të Tatimeve, Ilir Binaj, theksoi se dixhitalizimi mbetet një nga shtyllat kryesore për përmirësimin e shërbimeve ndaj tatimpaguesve. Sipas tij, gjatë vitit 2025 janë zbatuar një sërë shërbimesh që kanë sjellë lehtësira konkrete, ku paraplotësimi i deklaratës së TVSH-së ka rritur deklarimet në afat dhe ka kursyer rreth 54 mijë orë pune, ndërsa deklarata e të ardhurave personale ka sjellë një kursim prej rreth 36 mijë orësh. Ndërkohë, dixhitalizimi i vërtetimit të pagës vjetore ka kursyer rreth 1.5 milion orë për qytetarët dhe bizneset.
Planet për vitin 2026
Për vitin 2026, administrata tatimore planifikon të prezantojë rreth 11 shërbime të reja dixhitale, përfshirë automatizimin e rimbursimeve për fermerët dhe individët, si dhe aplikimin online për certifikatë rezidence, duke synuar reduktimin e kohës dhe kostove për tatimpaguesit.
Lufta kundër informalitetit
Paralelisht me dixhitalizimin, administrata tatimore po vijon aksionin kundër informalitetit, me fokus në sektorë të ndryshëm të ekonomisë. Në ndërtim, pas fazës së informimit, është shënuar një rritje prej rreth 20 për qind e të ardhurave personale dhe 14 për qind e kontributeve, duke reflektuar efektet e kontrolleve dhe formalizimit.
Kontrolle në turizëm dhe sektorin mjekësor
Në sektorin e turizmit, analiza e të dhënave nga platformat Booking dhe Airbnb ka identifikuar mijëra tatimpagues dhe dhjetëra milionë euro rezervime, ndërsa priten kontrolle për deklarimin e saktë të të ardhurave. Ndërkohë, nga 1 prilli, fokusi do të zhvendoset edhe te sektori mjekësor dhe ai i kujdesit personal, ku do të publikohen paga referencë dhe do të ndërmerren masa për subjektet që nuk i respektojnë ato.
k.jpg)