Kursi i këmbimit, BSH bleu mbi 1 mld euro në 2025, këtë vit ndërhyrja edhe më e fortë
Ndërhyrjet rekord në tregun valutor synojnë frenimin e forcimit të lekut dhe rritjen e rezervave.
Banka e Shqipërisë ka intensifikuar ndjeshëm ndërhyrjet në tregun valutor gjatë vitit 2025, duke blerë në total 1.027 miliardë euro, një nivel rekord që pasqyron përpjekjet për të menaxhuar presionet mbi kursin e këmbimit dhe për të forcuar rezervat valutore. Nga kjo shumë, 297.9 milionë euro janë realizuar përmes ankandeve të planifikuara, ndërsa 729.1 milionë euro përmes ndërhyrjeve të drejtpërdrejta jashtë ankandeve, të diktuara nga nevoja për të frenuar zhvlerësimin e euros dhe për të stabilizuar tregun.
Gjatë tremujorit të katërt të vitit 2025, Banka zhvilloi pesë ankande për blerjen e valutës, ku u përthithën 67.6 milionë euro, një nivel më i ulët krahasuar me periudhat pararendëse, por në përputhje me strategjinë e shpërndarjes së ndërhyrjeve gjatë vitit. Paralelisht, ndërhyrjet direkte në treg vijuan për të zbutur luhatjet e kursit në një periudhë kur leku mbeti i fortë ndaj euros.
Politikë aktive për kursin e këmbimit
Gjatë gjithë vitit 2025, ndërhyrjet përmes ankandeve arritën në 297.9 milionë euro, në rritje nga 283.8 milionë euro një vit më parë, por pesha kryesore mbeti tek ndërhyrjet jashtë ankandeve. Kjo tregon se politika monetare nuk është kufizuar vetëm në instrumentet tradicionale, por ka përdorur aktivisht ndërhyrjet në tregun valutor për të balancuar ofertën dhe kërkesën për valutë.
Forcimi i lekut, i nxitur nga hyrjet e larta të valutës nga turizmi, remitancat dhe investimet e huaja, ka krijuar nevojën për ndërhyrje të vazhdueshme, me qëllim shmangien e një mbiçmimi të shpejtë që mund të dëmtonte eksportet dhe konkurrueshmërinë e ekonomisë.
Planet për vitin 2026
Për vitin 2026, Banka e Shqipërisë parashikon një angazhim edhe më të madh në tregun valutor. Numri i ankandeve pritet të rritet në 26 nga 22 që ishin në vitin 2025, ndërsa shumat e blerjes në disa raste do të rriten në intervalin 6 deri në 12 milionë euro për ankand, nga 5 deri në 10 milionë euro më parë.
Objektivi total për blerjet përmes ankandeve në vitin 2026 është vendosur mes 330 dhe 450 milionë eurove, duke sinjalizuar se presionet mbi kursin e këmbimit pritet të vijojnë dhe se politika monetare do të mbetet aktive për të ruajtur stabilitetin financiar dhe valutor.
k.jpg)