Projekti i urave, BB: Ura e Viroit në Jug hapet në prill, gati dokumentet për 12 projekte të tjera
Banka Botërore konfirmon progresin e projektit të urave dhe zgjerimin e investimeve në gjithë vendin.
Ura e Viroit në jug të vendit, që lidh Gjirokastrën me pikën kufitare të Kakavijës dhe ka një gjatësi rreth 500 metra, pritet të hapet në muajin prill, sipas vlerësimit më të fundit të Bankës Botërore. Projekti mbështetet financiarisht me rreth 55 milionë dollarë dhe synon përmirësimin e infrastrukturës së urave në vend, si dhe rritjen e qëndrueshmërisë ndaj fatkeqësive natyrore.
Sipas raportit, progresi drejt arritjes së objektivave kryesore mbetet i qëndrueshëm, ndërsa zbatimi i përgjithshëm vlerësohet si mesatarisht i kënaqshëm. Projekti është i strukturuar në tre komponentë kryesorë, ku pjesa më e madhe e financimit, rreth 44 milionë dollarë, është dedikuar për ndërtimin dhe rehabilitimin e urave ekzistuese, ndërsa komponentët e tjerë fokusohen në forcimin e kapaciteteve institucionale dhe menaxhimin e projektit.
Investime të reja dhe zgjerim i projektit
Përveç urës së Viroit, raporti thekson se kontrata për ndërtimin e Urës së Beshirit është nënshkruar dhe ka hyrë në fazën e zbatimit. Në të njëjtën kohë, janë finalizuar dokumentet e tenderit për 12 ura të tjera, duke zgjeruar më tej ndërhyrjet në infrastrukturën rrugore.
Këto investime synojnë modernizimin e rrjetit ekzistues dhe rritjen e standardeve të sigurisë, duke adresuar rreziqet nga përmbytjet, erozioni dhe rrëshqitjet e dheut, që shpesh kanë ndikuar në dëmtimin e infrastrukturës dhe izolimin e zonave të caktuara.
Disbursimi dhe afatet e projektit
Të dhënat tregojnë se ritmi i disbursimit mbetet relativisht i ulët, me rreth 21 për qind të fondit të shpërndarë deri më tani, ndërsa mbi 47 milionë dollarë mbeten ende për t’u alokuar. Kjo tregon se pjesa më intensive e investimeve pritet të realizohet në vitet në vijim.
Afati i përfundimit të projektit është rishikuar dhe aktualisht parashikohet të mbyllet më 31 korrik 2029, duke i dhënë kohë autoriteteve për përshpejtimin e procedurave dhe zbatimin e plotë të investimeve në terren.
Rëndësia për infrastrukturën dhe ekonominë
Projekti konsiderohet kyç për Shqipërinë, duke qenë se vendi është i ekspozuar ndaj fenomeneve natyrore si përmbytjet dhe rrëshqitjet e dheut, të cilat në të kaluarën kanë dëmtuar rrjetin rrugor dhe kanë izoluar komunitete të tëra. Investimet në ura dhe infrastrukturë pritet të përmirësojnë ndjeshëm lidhjet rrugore, aksesin turistik dhe sigurinë për qytetarët dhe bizneset.
k.jpg)