Salla takon blegtorët, nuk jep zgjidhje për naftën: Subvencionet do jenë të njëjta
Ministri i Bujqësisë nuk dha zgjidhje për naftën, ndërsa theksoi rritjen e mbështetjes përmes skemës kombëtare.
Ministri i Bujqësisë dhe Zhvillimit Rural, Andis Salla, së bashku me Ministrin e Financave, Petrit Malaj, zhvilluan një takim me një përfaqësi prej 15 fermerësh, pjesë e protestës së organizuar gjatë ditës, për të diskutuar shqetësimet dhe sfidat e sektorit të blegtorisë.
Pavarësisht kërkesave të përsëritura të fermerëve për rikthimin e skemës së naftës pa akcizë dhe rritjen e subvencioneve pa kufizime, ministri Salla nuk dha një përgjigje konkrete për këto çështje, duke theksuar se mbështetja do të vijojë në kuadër të skemës ekzistuese.
Rritje e pagesave direkte për blegtorinë
Sipas ministrisë, përmes Skemës Kombëtare 2026 janë parashikuar rritje të mbështetjes për disa kategori kryesore të blegtorisë. Pagesat direkte për lopët do të rriten nga 10,000 në 12,000 lekë për krerë, për bagëtitë e imta nga 1,200 në 1,500 lekë dhe për koshere bletësh nga 1,000 në 2,000 lekë.
Gjithashtu, për herë të parë përfshihet mbështetja për rritjen e derrave, ndërsa pragjet minimale për përfitim janë përgjysmuar, duke përfshirë ferma me 5 krerë lopë, 50 krerë të imta dhe 25 koshere.
Salla bëri të ditur se në vitin 2025 pagesat direkte për blegtorinë arritën në rreth 2.5 miliardë lekë, ndërsa për vitin 2026 pritet të rriten në rreth 4 miliardë lekë, përfshirë edhe shtesat e mundshme gjatë vitit.
Mbështetje shtesë për prodhuesit e qumështit
Një tjetër masë e re është mbështetja për fermerët prodhues të qumështit, të cilët do të përfitojnë 10% të vlerës së faturave të shitjes. Ky mekanizëm synon të nxisë formalizimin dhe të rrisë prodhimin vendas në sektorin e qumështit.
Fermerët kërkojnë masa më të forta
Gjatë protestës, blegtorët kërkuan rikthimin e skemës së naftës pa akcizë për të ulur kostot, si dhe rritjen e subvencioneve deri në 15 mijë lekë për krerë, pa vendosjen e tavaneve për përfitim. Sipas tyre, kostot e larta të prodhimit po rëndojnë ndjeshëm aktivitetin dhe po rrezikojnë qëndrueshmërinë e sektorit.
Mungesa e një përgjigjeje konkrete për çështjen e naftës mbetet një nga pikat kryesore të debatit mes fermerëve dhe qeverisë, ndërsa sektori kërkon ndërhyrje më të drejtpërdrejtë për të përballuar rritjen e kostove.
k.jpg)