Çmimet e naftës rriten ndjeshëm pas sulmeve ndaj anijeve në Ngushticën e Hormuzit
Çmimet globale të naftës u rritën ndjeshëm pas sulmeve ndaj anijeve në Ngushticën e Hormuzit dhe pasigurisë mbi negociatat SHBA-Iran.
Çmimet e naftës shënuan një rritje të fortë në tregjet ndërkombëtare pas sulmeve ndaj anijeve tregtare në Ngushticën e Hormuzit, një nga rrugët më strategjike të furnizimit me energji në botë. Tensionet e shtuara dhe mesazhet kontradiktore mbi mundësinë e rifillimit të negociatave mes Shteteve të Bashkuara dhe Iranit kanë rritur ndjeshëm pasigurinë në tregjet globale.
Kontratat e ardhshme të naftës së papërpunuar Brent, treguesi kryesor global, u rritën me më shumë se 7 për qind gjatë tregtimit në Azi të hënën. Më pas, çmimet u stabilizuan pjesërisht, duke arritur në 94.69 dollarë për fuçi, nga rreth 90.40 dollarë që ishin në fundjavë.
Incidentet në Hormuz dhe reagimi i SHBA-së
Rritja e çmimeve erdhi pasi Presidenti amerikan Donald Trump deklaroi se forcat amerikane kishin sekuestruar një anije me flamur iranian, e cila dyshohej se po shmangte bllokadën ndaj porteve të Iranit. Kjo deklaratë pasoi raportimet nga Qendra e Operacioneve Tregtare Detare të Mbretërisë së Bashkuar, sipas së cilës gjatë fundjavës dy anije u sulmuan në ngushticë.
Sipas të njëjtave burime, një anije cisternë u qëllua nga mjete luftarake iraniane, ndërsa një tjetër anije kontejnerësh u godit nga një predhë e paidentifikuar, duke shtuar më tej tensionin në një zonë tashmë të brishtë gjeopolitike.
Pasiguri për armëpushimin dhe tregjet
Pavarësisht deklarimeve të mëparshme nga Teherani se ngushtica ishte e hapur, situata ndryshoi brenda pak orësh, me Iranin që përmendi vazhdimin e bllokadës amerikane. Në të njëjtën kohë, Shtetet e Bashkuara kanë paralajmëruar një raund të ri bisedimesh për armëpushim, por pa garanci për sukses, ndërsa afati i armëpushimit dyjavor pritet të skadojë së shpejti.
Ngushtica e Hormuzit mbetet një pikë kritike për tregtinë globale të energjisë, pasi përmes saj kalon rreth një e pesta e furnizimit botëror me naftë dhe gaz natyror. Çdo ndërprerje në këtë korridor reflektohet menjëherë në çmime dhe në politikat energjetike të vendeve.
Transporti bie, tregjet reagojnë
Të dhënat tregojnë se vetëm 19 anije kaluan nëpër ngushticë të shtunën, shumë më pak se mesatarja historike prej 138 tranzitesh në ditë, duke sinjalizuar një tkurrje të fortë të aktivitetit dhe rritje të rrezikut për furnizimin global.
Pavarësisht tensioneve, tregjet aziatike të aksioneve reaguan pozitivisht në hapje, me indekset kryesore që shënuan rritje të lehta, duke reflektuar një optimizëm të kujdesshëm të investitorëve, edhe pse perspektiva për deeskalim mbetet e paqartë.
k.jpg)