10 mld euro investime në 10 vitet e fundit, por Shqipëria ka akoma probleme me infrastrukturën
Pavarësisht shpenzimeve rekord në një dekadë, rrjeti rrugor vijon të përballet me mangësi dhe mungesë eficience.
Shqipëria ka investuar rreth 981 miliardë lekë, ose afërsisht 10 miliardë euro, në infrastrukturën rrugore gjatë periudhës 2014–2025, por rezultatet në terren nuk pasqyrojnë të njëjtin nivel zhvillimi. Sipas dokumenteve zyrtare, infrastruktura vijon të mbetet një nga sfidat kryesore për ekonominë e vendit.
Vetë Ministria e Infrastrukturës dhe Energjisë e pranon në Strategjinë e Transportit dhe Planin e Veprimit 2030 se vendi përballet ende me mangësi infrastrukturore, trafik të rënduar, mungesë standardesh të unifikuara dhe probleme në sigurinë rrugore, elementë që kufizojnë ndërlidhjen dhe performancën ekonomike.
Investime të larta, rezultate të kufizuara
Niveli i investimeve të kryera në këtë dekadë konsiderohet i krahasueshëm me standardet europiane, ku në kushte optimale do të kishte qenë i mjaftueshëm për përfundimin e rrjetit kombëtar rrugor dhe zhvillimin paralel të infrastrukturave të tjera strategjike. Megjithatë, fragmentarizimi i projekteve dhe kostot e larta për kilometër kanë ndikuar në uljen e eficiencës së këtyre investimeve.
Mungesa e një rrjeti të integruar funksional ka bërë që infrastruktura të mos arrijë të luajë plotësisht rolin e saj si motor i zhvillimit ekonomik.
Korridoret strategjike ende prioritet
Dokumentet strategjike theksojnë se modernizimi i Korridorit VIII, Korridorit Adriatiko-Jonian dhe zhvillimi i nyjeve multimodale mbeten prioritete kyçe për integrimin në rrjetin europian TEN-T dhe për përmirësimin e lidhjeve mes porteve, aeroporteve dhe hekurudhave.
Fakti që këto projekte vazhdojnë të jenë objektiva për të ardhmen, pas një dekade investimesh të konsiderueshme, ngre pikëpyetje mbi mënyrën e menaxhimit dhe efektivitetin e politikave publike në këtë sektor.
Paradoksi i zhvillimit
Shqipëria përballet me një situatë paradoksale: ka investuar si për një rrjet modern europian, por vazhdon të funksionojë me problematika tipike të një infrastrukture të papërfunduar. Ky vlerësim nuk vjen vetëm nga analiza të jashtme, por reflektohet edhe në vetë dokumentet strategjike të institucioneve përgjegjëse.
k.jpg)