Taksat Vendore: Sot afati i fundit për pagesën e taksës së ndërtesës, më pas nisin penalizimet
20 prilli shënon afatin për pagesën e këstit të parë të taksës së ndërtesës, ndërsa pas kësaj date nisin penalitetet për bizneset.
Drejtoria e Përgjithshme e Taksave dhe Tarifave Vendore pranë Bashkisë së Tiranës ka rikujtuar se sot është dita e fundit për shlyerjen e 50% të detyrimit për taksën e pasurisë së paluajtshme për pronat me qëllim tregtar. Pas këtij afati, subjektet që nuk kanë kryer pagesën do të përballen me kamatëvonesa dhe gjoba.
Afatet e pagesave për bizneset
Sipas rregullave në fuqi, kësti i parë i taksës së ndërtesës duhet të paguhet deri më 20 prill dhe përbën gjysmën e detyrimit total. Ndërkohë, pjesa e mbetur prej 50% duhet të likuidohet brenda datës 30 qershor.
Për taksat dhe tarifat e tjera vendore që lidhen me aktivitetin e bizneseve, afati i pagesës është i ndryshëm dhe zgjat deri më 31 maj. Këto afate mbeten të pandryshuara pas vendimeve të miratuara nga Këshilli Bashkiak në korrik 2025.
Kujdes me përditësimin e të dhënave
Autoritetet vendore kanë theksuar më herët rëndësinë e përditësimit të të dhënave nga ana e bizneseve dhe pronarëve të pasurive tregtare. Çdo ndryshim në xhiron vjetore, sipërfaqen e pronës apo vendndodhjen duhet të reflektohet në sistem për të shmangur pasaktësi në llogaritjen e detyrimeve.
Procesi i vetëdeklarimit realizohet përmes formularit elektronik të dërguar në profilin e taksapaguesve në portalin “e-Albania”, në rubrikën “Dokumentat e mia”. Plotësimi i tij siguron që detyrimet të llogariten mbi të dhëna të sakta dhe aktuale.
k.jpg)