BSH drejt Taksonomisë së Gjelbër, synon orientimin e investimeve drejt ekonomisë së qëndrueshme
Banka e Shqipërisë ka hedhur në konsultim draftin e parë të Taksonomisë së Gjelbër, një instrument që synon të drejtojë investimet drejt projekteve me ndikim pozitiv në mjedis.
Banka e Shqipërisë prezantoi draftin e parë të Taksonomisë së Gjelbër, një nismë që synon të orientojë kapitalin drejt aktiviteteve ekonomike të qëndrueshme dhe të rrisë transparencën në tregun financiar. Projekti realizohet në bashkëpunim me Bankën Evropiane të Investimeve dhe përbën një hap të rëndësishëm drejt përafrimit me standardet e Bashkimit Evropian.
Drafti u prezantua në një workshop teknik me pjesëmarrjen e institucioneve publike, sektorit financiar, biznesit dhe organizatave mjedisore, në kuadër të asistencës teknike për gjelbërimin e sistemeve financiare dhe krijimin e një kuadri të qëndrueshëm për financimin e projekteve klimatike.
Instrument për orientimin e kapitalit
Zëvendësguvernatorja e Dytë e Bankës së Shqipërisë, Natasha Ahmetaj, theksoi se taksonomia përbën një instrument kyç për orientimin e investimeve drejt aktiviteteve që mbështesin zhvillimin e qëndrueshëm dhe për forcimin e stabilitetit financiar. Sipas saj, kjo nismë do të ndihmojë edhe në ndërtimin e një sistemi më të plotë informacioni mbi klimën në sektorin financiar.
Taksonomia synon të vendosë kritere të qarta teknike për klasifikimin e aktiviteteve ekonomike sipas ndikimit të tyre në mjedis, duke ndihmuar institucionet financiare dhe investitorët të identifikojnë projekte të qëndrueshme dhe të shmangin fenomenin e “greenwashing”.
Përshtatje me standardet e BE-së
Procesi i hartimit është zhvilluar përmes një bashkëpunimi të gjerë ndërinstitucional, ku përfshihen ministritë kryesore, Autoriteti i Mbikëqyrjes Financiare dhe Banka e Shqipërisë. Qëllimi kryesor është sigurimi i përputhshmërisë me kuadrin evropian dhe lehtësimi i integrimit në tregjet financiare të BE-së.
Gjatë diskutimeve janë trajtuar konceptet bazë të taksonomisë, kriteret teknike dhe sfidat e përshtatjes në kontekstin shqiptar, ndërsa janë mbledhur komente nga aktorët e tregut për përmirësimin e draftit.
Hapi i radhës, finalizimi i dokumentit
Pas përfundimit të procesit konsultativ, pritet finalizimi i dokumentit dhe formalizimi i bashkëpunimit ndërinstitucional përmes një Memorandumi Mirëkuptimi, që do të shërbejë si bazë për zbatimin praktik të taksonomisë në vend.
Kjo nismë konsiderohet një hap i rëndësishëm drejt zhvillimit të financave të gjelbra në Shqipëri dhe përmbushjes së objektivave të Marrëveshjes së Parisit, si dhe një tjetër hap drejt integrimit evropian.
k.jpg)