Malaj për rritjen e çmimeve të referencës në rrethe, hipoteka regjistron më pak se vlera reale
Ministri i Financave paralajmëron ndryshime në çmimet referuese të pasurive për t’i afruar me realitetin e tregut dhe për të ulur evazionin fiskal.
Ministri i Financave, Petrit Malaj, deklaroi se qeveria po avancon në rishikimin e çmimeve të referencës për pasuritë e paluajtshme, me synim që ato të jenë sa më pranë vlerave reale të tregut. Sipas tij, aktualisht ekziston një diferencë e konsiderueshme mes çmimeve të regjistruara në Agjencinë Shtetërore të Kadastrës dhe atyre të tregtuara në tregun imobiliar.
Ai theksoi se një grup ndërinstitucional, i përbërë nga nëntë institucione, po punon për hartimin e metodologjisë dhe përcaktimin e çmimeve të reja referuese, duke marrë në konsideratë zhvillimet e tregut, zonat turistike dhe transaksionet reale të shitblerjes.
Ndarje e re në zona kadastrale
Ndryshimet e propozuara përfshijnë një riorganizim të territorit në 176 zona kadastrale, duke përfshirë për herë të parë edhe fshatrat. Zonat bregdetare dhe vijat e para të zhvillimit pritet të kenë çmime referuese më të larta, ndërsa në pjesën tjetër të territorit çmimet mund të mbeten të njëjta me nivelet aktuale.
Më herët, propozimet për rrethet kanë parashikuar rritje të çmimeve deri në 200 për qind në disa zona specifike, si ajo e Portit të Durrësit, duke reflektuar zhvillimin e shpejtë të tregut të pasurive.
Rivlerësimi i pronave dhe formalizimi i tregut
Ministri bëri të ditur se procesi i rivlerësimit të pasurive ka nisur në fund të vitit 2025 dhe do të vijojë deri më 31 dhjetor 2026. Deri tani janë regjistruar rreth 9,500 aplikime, ku 35 për qind i përkasin Tiranës dhe mbi 60 për qind qyteteve të tjera të vendit.
Sipas tij, skema e rivlerësimit, që aplikon një normë tatimore të reduktuar prej 5 për qind mbi diferencën e vlerës, synon të nxisë deklarimin më të saktë të çmimeve dhe të ulë nëndeklarimin në treg.
Autoritetet presin që kjo masë të ndikojë pozitivisht jo vetëm në formalizimin e tregut të pasurive të paluajtshme, por edhe në rritjen e të ardhurave buxhetore në afat të shkurtër dhe të mesëm.
Synim për një sistem më të drejtë taksimi
Përfshirja e aktorëve të tregut, si shoqatat e vlerësuesve dhe ndërtuesve, në grupin e punës synon të sigurojë një metodologji sa më të plotë dhe realiste. Qëllimi final është krijimi i një baze taksimi më të drejtë, më transparente dhe më efikase për pasuritë e paluajtshme.
Ministri theksoi se për momentin nuk mund të bëhet një vlerësim i saktë i të ardhurave të humbura nga diferencat aktuale, pasi analizat do të kenë kuptim vetëm pas miratimit të çmimeve të reja referuese.
k.jpg)